Haduh 87,691 ngut ki la dep ïoh ïa ka scholarship, ki bym pat ïoh dei bym pat pynïasoh Aadhar bad bank account

Shillong, Nailur 02 : Ka Sorkar Meghalaya ha ka sngi Balang ka la pyntip paidbah ba ïa ka scholarship hapoh ka Umbrella Post-Matric scheme jong ki samla pule ST ka jylla kb adei jong u snem 2025-26 ka la dep ban poi sha ki 87,691 ngut ki samla pule lyngba ka song pisa kaba 91.01 klur.
Kumban shu pynkynmaw hangne, ïa kane ka jingkyrshan pisa sha ki samla pule la pyllait paidbah da u Myntri Rangbah ka Jylla Conrad K Sangma ha ka 27tarik u Nailar mynta u snem. La dep ruh ban pynshai ha kato ka sngi ba kane ka pisa kan shim por hdauh kumba san ne hynriew sngi ba kan poi sha ki bank account jong ki samla pule. Hynrei ha ka jingpyllait khubor la pyntip ba ïa kane ka pisa la lah ban pynpoi shwa ka por lyngba ka SNA-SPARSH route kaba pynpoi ïa ka pisa beit na ka RBI sha ka account jong u samla pule.
Na ka liang ka sorkar ka la pynshai ba kane ka pisa ka la poi beit sha ki bank account jong ki samla pule kiba la dep ban pynïasoh ïa u Aadhar bad ki bank account.
Ka kyrwoh khubor ka ong ruh ba na ki 96,812 tylli ki aplikeshon kiba la pynshisha mynta u snem, haduh 61,194 tylli kidei kiba dang aplai thymmai bad 35,618 tylli pat ki dei kiba shu pynthymmai. Kumta la ong ba na kine baroh, 87,691 tylli la dep ban pyllait ïa ka pisa.
“Ki 9,121 kiba dang sah kim pat ïoh ïa ka pisa namar ka jingbym pat pynïasoh ïa ka Aadhaar ne namar ki jingbakla bda ka bank account. Hynrei ka pisa ka dang don beit naba la buh kyrpang na ka bynta jong ki,” ong ka kyrwoh na ka Sorkar.
Shuh shuh la ong, “Ki samla pule kiba ym pat ïoh ïa ka pisa haduh mynta la kyntu ba kin leit sha ki bank jong ki bad ban pynïasoh ïa u Aadhaar bad ka bank account jong ki. Ynda la dep leh ïa kane, yn pynpoi ïa ka jingsiew ha ka sien kaba wan,” la ong ka Sorkar.
Ka jingdonkam pisa baroh na ka bynta u snem 2025-26 ka long 198.43 klur. Katba na kane, 84.55 klur na ka bhah jong ka sorkar pdeng bad 9.40 klur na ka bhah jong ka sorkar jylla kaba long baroh 93.95 klur baroh lang la pynbiang haduh mynta. Kumta na kane, haduh 91.01 klur la dep pyllait bad kaba sah kaba long 2.94 klur ka dang don hapoh ka jingpynbeit.
La ïathuh ruh ba na bynta ka 104.48 klur kaba dang sah yn pyllait ha ki instalment kiba wan ha ki san bynta kiba ryngkat, sha baroh ki samla pule kiba dei hok, ha ka jaka jong ka rukom siew kaba mynshwa ha kaba tang kumba 20 percent ki ïoh ïa ka jingsiew pura ha ka bynta kaba nyngkong, la ong ka Sorkar.
Haba batai ïa ka por kaba don hapdeng ka jingpynpoi bad ka jingïoh ïa ka pisa, ka kyrwoh na ka sorkar ka la ong ba ki jingsiew ki ïaid lyngba ka jingpynkhreh ïa ka beneficiary list da ka Directorate of Higher and Technical Education, ka jingmynjur na ka Treasury, ka jingpyllait ïa ka pisa na ka bynta ka bynta jong ka Centre bad ka Jylla, ka jingpynbeit da ka RBI bad ka jingthep pisa ba khatduh da ki bank jong ki samla pule, bad ka por ka lah ban ïapher katkum ka bank.
Ha ka jingpynbeit katkum ki distrik, East Khasi Hills ka don 25,525 tylli ki aplikeshon kiba la pynshisha, West Jaintia Hills 12,552, West Garo Hills 10,601 bad Ri Bhoi 9,388, nalor kiwei pat.
La pyntip ruh ba ki aplikeshon na ka bynta u snem 2026-27 ha ka National Scholarship Portal ki la plie naduh ka 03 tarik Naitung haduh ka 30 tarik Naiwieng, 2026, bad la kyntu ïa ki samla pule ba kin pynthikna ba ki Aadhaar jong ki kin dei kiba la dep ban pynïasoh bad ka bank account ha ka por ba ki aplai.
Na ka bynta ka jingïarap, ki samla pule ki lah ban phone ha 7005037347 ne 9615000269, lane email ha scholarshipregn@gmail.com.