Shillong, Lber 23: Ka Tnad Meghalaya Police kala peitngor bha mynta ïa ki jaka khappud ka Jylla kynthup bad ka Ri Bangladesh, ban nym ailad ïa ka jingpynrung bad jingkhaii ïa ki kynthei Rohingya na Jylla.
Kane ka jingpeitngor kala wan jia hadien ba ka National Investigation Agency (NIA) kala kem dang shen ïa uwei u samla Pnar na East Jaiñtia Hills District (EJHD) halor ka jingkynnoh donkti ban khaii ïa ki kynthei Rohingya kiba phetwir na Ri Myanmar.
“Ka Tnad Pulit ka Jylla kala peitngor bha ha ki jaka khappud ka Jylla khamtam ha East Jaiñtia Hills da ka jing kem ka NIA ïa uwei u samla napoh ka District” ong u ma Lahkmen Rymbui, Myntri ka Tnad kam pohïing ka Jylla.
Ha ka 11 tarik Lber, ka NIA kala ïoh kem haduh hynriew ngut ki briew kiba donkti ban khaii ïa ki kynthei Rohingya sha kylleng ki Jylla jong ka Ri India. Ïa kine ki briew la kem ha ka jingkhynra ha kylleng ki jaka ka Jylla Meghalaya, Assam bad Karnataka.
Ka NIA kala ïohkem ruh ïa u nongsuhbuit (Mastermind) ba ïalam ïa kane ka kynhum bymman uba kyrteng u Kumkum Ahmed Choudhury uba treikam na Bangalaru.
Haba kylli halor ka jingkem ïa u samla na EJH, u Myntri ula ong “ Ngam pat ïoh ïa ka jingtip ba bniah halor kane ka jingjia hynrei hooid ka NIA kala kem ïa uwei u samla ba donkti bad leh ïa ka jingtohkit bad ïa kaei kaba ka Tnad Pulit ka Jylla ka dei ban iarap kan ai ka jingiarap”.
Ki san ngut kiwei pat ki dei u Sahalam Laskar ba na Cachar, Assam, Ahiya Ahmed Choudhury na Cachar Assam, u Bapan Ahmed Choudhury na Cachar, Assam, u Jamaluddin Ahmed Choudhury na Cachar, Assam bad u Wanbiang Suting uba dei na East Jaiñtia Hills District.
La ka Tnad Meghalaya Police kala pynlong ne em ïa ka jingtohkit ban pynthikna la ka don ne em ka jingpynrung bad khaii ïa ki kynthei Rohingya na khappud ka Jylla Meghalaya, u Myntri ula ong “Na ka liang ka jong nga hi ngam pat tip ïa kane hynrei nga thikna ba ka Tnad Pulit kala pynlong ïa ka jingtohkit…Ngam tharai ba kan shu sngap ïa katr kane ka jingjia”.
U Myntri ula ïathuh ba ka Tnad Pulit ka don ïa ki kynhun Anti Trafficking la ka dei ha ka kam khaii briew, khaii droks, khaii mar tuh bad kiwei kiwei.
Haba kylli, u Myntri kam pohïing ka Jylla ula ong “Haduh mynta hi ngim pat tip la une u samla (Wanbiang) u dei uba donkti ha ka kam khaii ne u ba pynrung, ne uba shu ïoh bainong ban iarap. Ka jingeh hi ka long ba kane ka dei ka case jong ka NIA ka ba ka jingtohkit ka long jar jar”.
