Mynta bun ki ong ngim dei NPP hynrei ha ka elekshon MP ka vote sha u Dr.Nonglait: Bah Sniawbhalang

Shillong, Nailar 30 : U National Vice President ka NPP ba dei ruh u Symbud Myntri Rangbah ka Jylla, Bah Sniawbhalang Dhar, ha ka Sngi Saitjaiñ u la ong ba Mawthadraishan, kaba la ñiew kum ka constituency kaba tlot na ka bynta ka NPP, hynrei kan ai 90 percent ki vote sha u kyrtong ka NPP ha ka elekshon MP shiteng samoi na Shillong Lok Sabha, Dr. DRL Nonglait bad kan long ruh ka nuksa ïa baroh ki 35 tylli kiwei pat ki constituency.
Haba kren ha ka jingïalang ïalap elekshon ha Lawbyrtun, u Bah Sniawbhalang u la ong ba u la leit sha palat 1,800 tylli ki jingïalang elekshon kylleng ka jylla bad um pat shym la ïohsngew wat tang kawei ka jingkynthoh kaba sniew pyrshah ïa u Dr Nonglait.
“Haduh mynta nga la leit sha palat 1,800 tylli ki jingïalang. Ym don wat tang kawei ka jingïalang kaba ong ba u Dr. Nonglait um long uba bit. Wat ki briew kiba wan thymmai ki ong ba ka NPP ka la pynieng ïa u kyrtong uba paka bha mynta ka kynti. Kata ka long ka dak kaba bha,” u la ong.
Haba pynïapher ïa ka rukom thep vote jong ki paidbah ha Jaintia Hills bad kiwei pat ki thaiñ, u Bah Sniawbhalang u la ong, “Ha Jaintia Hills don 7 ngut ki MLA bad bun na ki ki don ha ka liang synshar namar ki pyrkhat shwa ban thep vote. Kim thep vote tang namar ba ka sur jingrwai ka itynnad. Ki nang ban jied ïa ki nongmihkhmat.”
Da kaba ong ba ka roi ka pa kaba ryngkat katkum ka jingpynmih ïa ka rai kaba biang une u nongïalam ka NPP u la ong ruh, “Lada Jaintia Hills ka ai bun ki vote, kin ïoh bun ka roi ka par. Lada West Khasi Hills ka ai bun, phi ruh phin ïoh bun. Hynrei nga lah ban ong ïa phi, lada duna eh ruh 60 percent na Jaintia Hills ngin pynthikna na ka bynta u Dr Nonglait.”
Haba kam ba ka Mawthadraishan ka la sdang kylla, u la ong, “Ki briew na kane ka constituency ki ong ïa nga – Ma Sniawbha, ngim dei ki NPP hynrei mynta ngin thep vote na ka bynta u Dr Nonglait. Ha Bynther, ha ka elekshon ba la dep ngi ïoh tang 9-10 vote, mynta 200 ngut ki briew ki la pynlong jingïalang na ka bynta u Dr Nonglait.”
U Bah Sniawbhalang u la ïathuh ruh ba ka party ka pynlong 30 haduh 40 tylli ki jingïalang man la ka sngi ha ki 36 tylli ki constituency.
“Ma nga, u Bah Prestone bad u Myntri Rangbah, ngim thiah shuh. Baroh ki MLA, ki block president bad ki MDC ki trei shitom. Ka jingjop ka dei ka jong ngi, hynrei ngi dei ban trei shitom,” u la ong.
U la kyrpad ïa ki nongthep vote ba kin ym shah pynbiej, da kaba kynmaw ba ka NPP ka la ïoh tang 96 vote ha Lawbyrtun ha ka elekshon ba la dep.
“Shim ïa kane kum ka jinghikai. Ngi dei ban nang na ki jingbakla,” u la ong.
Haba kdew ïa ki kam pynroi, u la ong ba ka sorkar MDA kam pynïapher ïa ki constituency katkum ka party.
“Ka surok Weiloi-Balat-Ranikor kaba shongdor 600 klur tyngka ka don ha ka UDP constituency, hynrei ngi dang tei ïa ka. Ka surok Nongstoin-Maweit-Nongjri kaba shongdor 380 klur ryngkat bad 100 klur ha u snem ba la dep ka don ha ka HSPDP constituency. Kata ka pynshisha ba ngi don hangne ban shakri,” u la ong.
U la bynrap ba naduh u snem 2018, ki bynta jong ka koit ka khiah, ka pule puthi, ka bording bad ka kam jngohkai pyrthei ki la ïoh ïa ka jingpynsam bynta kaba ryngkat jong ki kam pynroi ha baroh ki district.