SSA 2nd Div’n: Ar tylli ki hat trick thep u Hamlet Thabah; Jop ka Umlyngka bad Mawryngkneng

SHILLONG, Nailar 30: Ka Umlyngka SC ka la mad ïa ka jingjop kaba bun kol tam da 11-1 kol ha ka jingïakhun pyrshah ïa ka Umphrup SC ha ka Second Division Football league 2026 ba la pynïaid da ka Shillong Sports Association, ba la long ha ka sngi Saitjaiñ ha SSA Ground.
U Hamlet Thabah u la long u namtam na ka bynta ka Umlyngka, da kaba thep ar tylli ki hat trick kiba la wan ha ka minit kaba 19, 36, 53, 58, 70 bad 72. U J Andy Wilson Nongkhlaw u la bynrap ar tylli ki kol (55 & 83’) katba u Nichelson Lyngkhoi (2’), u Tirotbornson Kharbangar (74’) bad u Hunkupar Wanniang (90+1’) ki la pynkhihjar mar shi sien.
Ka shi kol jong ka Umphrup la thep da u Nangkhraw Kharumnuid ha ka minit kaba 88.
Shuwa kane, ka Mawryngkneng SC ka la mad ïa ka jingjop da kaba pynliem 1-0 ïa ka Mawkriah West SC. Hadien ka jingïakhun kaba khlem kol ha ka kylla step ka Mawryngkneng ka la ïoh ba kan thep ïa ka namtam ha ka minit kaba 88 lyngba u Ialambha Pyngrope.
Ki jingïalehkai ha kane ka sngi Nyngkong ki long: ha SSA Stadium ha ka por 12:30 baje mynsngi ka Jongksha SC kan ïakhun pyrshah ïa ka Tynring SC; nangta ha MFA Ground ha ka por 1 baje mynsngi ka Nongmensong SC kan aireng pyrshah ïa ka Smit SC.