Ym pat lah ban ong lano yn sdang ka Tura Medical College, haduh 57 ngut dang duna ki nonghikai

Shillong,Nailar 27 : U Myntri ka tnad ka Koit ka Khiah ka Jylla, Bah Wailadmiki Shylla ha ka Sngi Palei u la pyntip ha Ïingdorbar Thawaiñ ba kim pat lah ban ai ïa ka por kaba thikna lano ban sdang ïa ka samoi pule doktor kaba nyngkong ha Tura Medical College and Hospital, namar dang ki dang don ki jingduna ha ka jingdon ki nonghikai watla ka jingpyntrei ïa ka kam ka la ïaid sha ka 83 persen.
Ïa kane u Myntri u la jubab halor ka Call Attention Notice ba la wanrah da ka MLA ka NPP na Gambegre, ka Dr. Mehtab Chandee A. Sangma. Shwa kane ka MLA ka la pan jingtip shaphang ka jingïaid jong ka jingtrei, nangta ka jingthungkam ïa ki nonghikai, ka jingpynkhreh jong ka hospital bad ka por ban sdang ïa kane ka jaka pule doctor na bynta ka snem pule 2027-28.
Shwa kane, u Myntri u la pyntip ba ïa kane ka projek la pdiang ha ka snem 2017-18 da ka mang pisa kaba kot sha ka 189 klur, kaba kynthup ïa ka 170.10 klur na ka Sorkar Pdeng bad 19 klur pat na ka bhah jong ka Sorkar Jylla, hapoh ka skim ban seng ïa ki medical college kiba ïadei bad ki district hospital.
Shuh shuh u la ong, ba ka MoU bad TCIL la soi ha u Nohprah 2014 ban seng ïa ka medical college kaba don 100 tylli ki seat, da ka jinglut kaba mang 234 klur. La ïathuh ba ka Sorkar Jylla ka la mynjur ban pyndap ïa ka jingduna ha ka pisa kaba dang donkam.
U la ïathuh ruh ba ka jingwad ïa ka jaka kaba biang ka la nang pynslem ïa ka projek da bun snem. “Ka jingthmu nyngkong ban pynheh ïa Tura Civil Hospital kam shym la urlong namar ka jingshah kyntur pud ïa ki jaka. Ka jaka ha Balagre ruh la shem ba kam biang namar ka don haduh 17 KM na ka hospital, kaba pynkheiñ ïa ka kyndon jong ka NMC kaba ong ba ki jaka jong ka medical college kim dei ban jngai palat 10 km,” u la ong.
La ïathuh ba hadien kata, la jied ïa ka jaka ha Doldegre ha u snem 2017, bad ka jingbit na ka tnad Khlaw la ïoh ha ka 22 tarik Kyllalyngkot 2019.
“Ka projek ka la mad sa ïa ka jingeh namar ki jingïakhih pyrshah ïa ka CAA-NRC ha u Nohprah 2019 bad ka jingwan ka khlam COVID-19 ha u Lber 2020”, u la ong.
U Myntri u la ïathuh ruh ba katkum ka kaiphod, ka academic block ka la dep 80 persen, katba ki hostel kynthei bad shynrang ki la dep 78 persen. Ki Type-5 quarter bad ka jaka sah jong u Dean ki la dep 99 persen. Ki staff quarter Type-2 bad Type-3 ki la dep 50 persen, katba Type-4 ki la dep 40 persen. Shuh shuh u la ong ba ka electrical sub-station pat ka la dep 85 persen.
Nangta la ong ba ki block bathymmai jong ka hospital, ka 80-bedded block ka la dep 40 persen, katba ka 150-bedded block ka la dep 25 persen.
“Ka teaching hospital kaba don mynta ka kynthup ïa 200 tylli ki jingthiah ha Tura Civil Hospital bad 50 tylli ha Tura MCH Hospital. Kane ka long ïa ka jingdonkam jong ka National Medical Commission (NMC) kaba long 220 tylli ki jingthiah na ka bynta ka medical college kaba don 50 tylli ki MBBS seat.”
Ha kaba ïadei bad ka jingthungkam, u Myntri u la ïathuh ba la seng ïa ka Manpower Assessment Committee hapoh ka jingïalam jong ka Joint Secretary, Dr. Rezina Ch. Marak, ha ka 21 tarik Nailar 2025 bad katkum ki jingai jingmut jong kane ka committee, la thaw 59 tylli ki post contractual.
“La pynmih lai sien ïa ki advertisement ha 5 tylli ki kotkhubor ba pynmih ha baroh kawei ka ri (national newspaper) bad 3 tylli ki kot khubor ha ka jylla,” ong u Myntri. Shuh shuh la ïathuh ba ka la don ruh ka jingïakren bad ki doctor kiba trei hapoh ki jaka sumar ha Garo Hills.
Hynrei, watla hdien kine ki jingpyrshang ruh u Myntri u la ong ba ka jingdon ki nonghikai ka dang duna bha.
“Na ka bynta ka medical college kaba don 50 tylli ki seat, ka NMC ka dawa ba dei ban don 97 ngut ki nonghikai hynrei ha Tura Medical College dang don tang 40 ngut, kaba pynlong ïa ka jingduna haduh 57 ngut,” u la bynrap biang.
La ïathuh ba kumba ka long mynta, katei ka jaka pule doctor ka don 3 ngut ki Professors katba ka NMC ka buh ba dei ban don 14 ngut. Haba ïadei bad ki Associate Professors la ïathuh ba don 3 ngut katba ka NMC ka dawa ba dei ban don 20 ngut.
Haba ïadei bad ki Assistant Professor ki don 16 ngut katba ka NMC ka dawa ban don 25 ngut. Haba ïadei bad ki Tutor ki don 10 ngut katba ka NMC ka dawa ba dei ban don 15 ngut. Haba ïadei pat bad ki Senior Resident u Myntri u la pyntip ba ki don 8 ngut katba ka NMC ka dawa ka dei ban don 23 ngut.
La ïathuh ba haba ïadei bad ka Shillong Medical College, kaba don 50 tylli ki seat, mynta ka la don 83 ngut ki nonghikai ha ka por ba wan peit ka NMC, bad ka la kiew sha 84 ngut haduh 24 tarik Nailar 2026, haba ka jingdonkam katkum ka NMC ka long 97 ngut.
Shuh shuh u Myntri u la ïathuh ba ka Sorkar ka la pyrshang ban pyn treikam ïa Tura Medical College kum ka Government Medical College ha kine ki 12 bnai ba la dep. “Hynrei haba peit ïa ka jingdon ki nonghikai mynta, ym pat lah ban ai ïa ka por kaba thikna ha kane ka por,” u la ong da kaba pynthikna ba ka Sorkar kan bteng ban trei ban pyndep ïa ki kyndon jong ka NMC.