Bna nam ka sorkar ba kwah kyntiew tang ïa ki briew ba nabar bad thungkam tang ba ïadei saiñ pyrthei: VPP

Shillong, Nailar 25: U President ka Voice of the Peoples Party (VPP) u Bah Ardent Miller Basaiawmoit, uba dei ruh u MLA na Nongkrem Constituency u la kynthoh hapoh ka dorbar synrai ïa ka jingshah khot bad bna nam jong kane ka sorkar kaba mynta ha ki briew kiba ong ba kane kadei ka sorkar kaba kwah ban kyntiew tang ïa ki briew kiba nabar jylla.
Ïa kane u la kynthoh hapoh ka jingïatai nia kaba lyngkot kaba u la wanrah ban ïakren halor ki 10 tylli ki mat dawa jong ka party na ka sorkar ba ka dei ban shimkhia. Kane ka jingkynthoh jong u, ka la paw hapoh kawei na ki mat jingdawa ba ka sorkar kadei ban pynduh pyndam noh ïa ka jingbishar paidbah haba ïadei bad ka jingkhlong ne tih mawshun jong ka karkhana Shree Cement hapoh East Jaiñtia Hills da kaba kynnoh ba ïa kane ka jingbishar paidbah la leh beaiñ khlem da sngap lang ïa kiba pyrshah.
Ki mat dawa ba la wanrah da ka VPP lyngba u President jong ka bad da ka jingkyrshan lang ki laingut ki MLA jong ka, ki long ban pyndam noh ïa ka Lumpongdeng Project, nangta ba ka sorkar ka dei ban pynshitom ïa ki nonghikai ban weng ïa ki rukom treikam ka sorkar kaba long pyrshah ïa ki nonghikai, nangta ban pynduh ïa ka jingdon bynta saiñ pyrthei hapoh ki jingthep kam thep jam hapoh DSC bad MPSC da kaba wanrah ïa ki sakhi jong ki 3 ngut ki kyrtong hapoh West Jaiñtia Hills kiba la ïoh ban leit sha ka personal interview hapoh DSC watla ki khlem da la jubab ïa ki jingkylli katba donkam bad kynnoh ruh ba kitei ki 3 ngut ki dei kiba don jingïadei bajan bha bad ki riew saiñ pyrthei, nangta ban pynsangeh noh ïa ka jingthungkam pynjlan ïa ki nongtrei ne ophisar ba la shongthait naba ka pynduh jingkyrmen ïa ki samla khlem kam khlem jam kiba la nang la pule.
Kawei pat ka jingdawa ka long ban pynsangeh ka jingïadie ïathied jaka na shadien bad ban ïada ïa ki khyndew ki jaka jong ki paidbah. Nangta ban pynlong ïa ka jylla kaba shngaiñ ban khanglad ïa ka jingwanrung beaiñ ki mynder khamtam ha ki khappud kum sha West Khasi Hills, ban pynsangeh mardor ïa ka jingtreikam beaiñ ki karkhana Coke bad ban phah noh ïa ki poi wir beaiñ.
Kaba kham kongsan eh ka dei ban wengnoh ïa ka jingshah khang ka kam tih dewïong da kaba ailad pat ban ïaid katkum ki kyndon aiñ bad kiwei ki kyndon kiba kongsan ban ïada ïa ka ïoh ka kot ki longïing bad ki nongbylla, nangta ban wengnoh ïa ka jingkhang tihmaw khlong shyiap naba kane ka la ktah bha ïa ki nongbylla bad kumjuh ruh ïa ki nongñiah trok bad ki briew kiba ju im ha kane ka kam bad donkam ban thaw ïa ki aiñ kiba long pdeng na ka bynta ki paidbah, ki ban ym ktah ïa ka sawdong sawkun.