Ha Shillong District Jail, la wanrah biang ïa ki heh nongïalam ka KSU na ri lum Garo

Shillong, Nailar 25: Ki lai ngut ki nongïalam ba ha khlieh duh jong ka Khasi Students’ Union (KSU) kiba la shah kem la wanrah biang na ki phatok na ri lum Garo sha phatok ha Shillong district jail ha ka sngi Ba-ar.
Ki nongialam kiba la shah kem ki kynthup ïa u President ka KSU u samla Raymond Kharjana, u Vice President u samla Pynkmenlang Sanmiet bad u General Secretary u samla Reuben A Najiar.
Haba pyntip halor katei ka jingjia, u General Secretary barim ka KSU u bah Donald V Thabah u la ong, “Ngi la ïoh jingtip ba la wanrah ïa ki hangne mynta ka step bad ngi la ïakynduh mardor ïa ki.”
“Ki la ai bor ïa ki dkhot ka CEC kiba don shabar ban shong jingïalang CEC ban shim ïa ka rai ha kaba ïadei bad ka jingkhot ïakren jong ka sorkar halor ki san tylli ki mat jingdawa ba la buh da ka KSU,” ong u Thabah.
Shuh shuh u la ong ba baroh lai ngut ki nongïalam ki don ha ka met kaba koit ba khiah.
“Baroh lai ngut la wanrah hangne bad ki don ha ka met kaba koit ba khiah, ki dang ïoh ïa ki dawai kiba donkam.Kumta kine ki dkhot jong ka CEC mynta kin sa shim ïa ka rai kumno ban ïaid shakhmat ha kaba ïadei bad ka jingkhot ïakren jong ka sorkar,” u la bynrap.
Ha kajuh ka por, la kem ruh ïa u assistant organizing secretary ka KSU, kaba pynlong ïa ka jingïoh kem baroh sha ka saw ngut ha kaba ïadei bad ka jingïakynad kaba la jia ha ka 19 tarik u Nailar ha ka por ba pynlong ïa ka rally thuk thuk ka KSU.
Kane ka jingshah thombor ka la pynlong ïa ar tylli ki kali ban shah thang, 31 tylli ki kali shah pynjulor bad 18 ngut ki briew ba shah thombor.