Nongstoiñ, Nailar 25: Na ka bynta ban plie lad bad pynsngewthuh ïa ki samla ïa ka rukom thep kam thep jam ha kiba bun ki bynta la ka dei hapoh ka jylla, shabar ka jylla bad sha kiwei pat ki ri, ka kynhun jong ka Meghalaya State Skill Development Society ha kane ka sngi hatmajai ka 25 tarik Nailar ka la khot ïa ka jingïalang kaba kyrpang ha ophis jong ka Nongstoiñ C&RD Block na ka bynta ki samla wad kam napoh ka district bad kumba 203 ngut ki samla na kylleng ki jaka jong ka West Khasi Hills district ki la wan ban ïashim bynta.
Na kitei ki 203 ngut tang kumba 152 ngut ki la ïoh ban pynrung kyrteng bad ban ïa shim bynta ha ka rukom thep kam thep jam. Katei ka jingpynrung kam ka ailad ïa ki samla ban ïoh jingtip kumno ban wad ki lad ki lynti ban lap ïa ki nongaikam kiba don shabar ka jylla bad shabar ka ri India ruh katkum ka sap ba ki don ryngkat ka jingnang jingstad jong ki.
Ha kajuh ka por kitei ki samla ki la ai khublei ruh ïa u Myntri Rangbah ka jylla bad ka sorkar halor ka jing wanrah ïa katei ka prokram hapoh ka district kaba la plie lad plie lynti ïa ki ha ka ïohkam ïohjam hapoh ka jylla bad sha kiwei pat ki jylla. Ha kajuh ka por ki la pynpaw ba ka jingshimkhia jong ka sorkar ban plie lad ïa ki samla wad kam lyngba ki prokram kiba kum kine ka long ka kabu kaba khraw ïa ki samla jong ka jylla kiba kwah shisha ban trei ïa ki kam katkum ka sap kaba ki don.
