Jowai, Nailar 25: U Superintendent of Police ka West Jaiñtia Hills District, Jowai ula pyntip ha kane ka 24 tarik Nailar, 2026, ki pulit ka Amlarem PS kila ïoh bad lap na Ladjaplem ïa ar tylli ki thuk thuk ba shah tuh kiba don ïa u No. AS-01FK 3482 bad AS- 26A 9873 bad kiba la ñiah da u Pynshngai Jyrwa 23 yrs na Umsning, Lasharai, Mawkhan, Ri-Bhoi District bad u Rijiedstar Shylla 27 snem na Umsning, Sohkyndur, Ri-Bhoi District.
Ki pulit ha ka jingtalasi bad tohkit ïa kitei ki thuk thuk la pyntihkna ba la rong tuh ïa ki na Changsari, Assam, kumta ki pulit kila register case katkum ka kyndon 303 (2) BNS. Ïa kitei baroh ar tylli ki thuk thuk bad ki briew ba shah kem mynta ka sngi la aiti noh ïa ki sha ki pulit ka Changsari Police Station, Assam na ka bynta ban leh ïa kaba donkam.
Shuh shuh, ha katei ka juh ka sngi jong ka 24 tarik ar tylli ki thuk thuk ba suba shah tuh kiba don ïa u No. NL-07EB 8467 bad AS- 05S 3378 ha ryngkat ki nongñiah la ïoh kem ïa ki da ki pulit ka Dawki PS. Ïa kitei ki thuk thuk la buh ha Dawki PS na ka bynta ka jingtohkit ba bniah.
Na ka liang jong ki Pulit ka District ki la kyntu ïa ki paidbah ban long kiba husiar bad sumar bha ïa ki kali ki mator bad ki thuk thuk ar shaka. Lada don kino kino ki jingsuba shah tuh kin pyntip mar mar sha ki Pulit lane phone ha u 112.
