Shillong, Nailar 25 : Ka Nangkiew Irat ka la ïoh ba kan khur ïa ka jingjop ryngkat bad ka lai point ba nyngkong jong ka ha ka lympung Shillong Premier League 2026, ka Shillong Spprts Association bad kane ka la wan hadien ba ka la lah ba kan pynliem da 2-0 kol ïa ka Laitkor SC, ha ka jingïakhun kaba long mynta ka sngi.
Ïa ki artylli ki kol ka Nangkiew Irat ban khur ïa kane ka nam jop ba nyngkong la thep da u Ronaldkydon L Nonglait (67’) bad Jefferson Pakyntein (90’+4).
Ka Laitkor SC ka rung sha kane ka jingïakhun da ka mynsiem ba rhem bha namar ba ka la lah ba kan pynliem noh ïa ka Mylliem, kaba naka bynta ka jingïakhun ba mynta ka sngi, ka wanrah ïa ki lai tylli ki jingkylla ha ka thup ki rang ïalehkai ki jong ka, ha kaba u Samborwell Mynsong, Shaipharlin Nongsiej bad Kitdor Kharphuli ki la wan ban ïalehkai naba sdang ha shwa jong u Balajiedlang Lyngwa, Eddisius Kharkongor bad Damutskhem Mawrie.
Haba phai pat sha Nangkiew kaba rung sha kane ka jingïakhun hadien ba ka la lah ba kan ïakhaid pyrshah bad ka Nongkseh na ka jingïakhun ba la dep ka don haduh saw tylli ki jingpynkylla ha kaba u Sangti Janai Shianglong, Edyvenson Dhar, Dibinroy Nongspung bad Restom Khriam ki la wan ban mih noh shwa ha ka jaka ka jong u Terry C Khongsti, Yhoto Lohe, Neblejohn Lyngkhoi bad Maxderidoff Wahlang.
Ka kylla step jong ka jingïakhun ka long ki arliang mamla, ki la buh ïa ka thong ban ïa nion beit shakhmat, kampher ba ki la mihpaw ruh ki sien ïa pyrshang ban pynkhih ïa ka jar, ki jingpyrshang ba kham paw ha kum kane ka por ki la wan na u Kitdor, u Dibinroy bad u Shelbilkstar Kharshilot ka Nangkiew Irat
Haba wan ban bteng ïa ka kylla miet, marsien ïa sdang, ka Nangkiew ka la nang kham pynkhlain ïa la ka kynhun da ka jingbulji ïa ki rangïalehkai, ha kaba uwei na kiba la ïa bujli dei u Yhoto, ha kaba marsien ïa rung madan, u la lah ban pynma bha ïa ka kut ïalehkai ka Laitkor.
Hadien ba la shah tam shakhmat shwa da shi kol, ka Laitkor ka la pyrshang lem ban pynïakhaid, kaba ki jingpyrshang ki jong ka kam shim la poi pat sha ka thong kumba ka la thmu bad ha ka minit ba la pynjlan ïa ka por ban pynwai noh artad ïa ka jingïakhun, ka Nangkiew ka la ïoh ba kan thep pat sa ïa ka kol kaba ar kaba la pynlong ïa ka Laitkor ban mad ïa ka jingshah rem ha kane ka sngi.
Lashai ka sngi, ka jingïakhun kan long hapdeng ka Mylliem pyrshah ïa ka Mawlai SC, kaban sdang ha ka por 3:40 PM. Ka Mylliem kan rung sha kane ka jingïakhun hadien ba ka la dep shwa ba kan shah rem ha ki artylli ki jingïakhun ba ka la dep shakhmat.
