Mawkyrwat, 20 Nailar: Ki briew bym lah ithuh ha ki por kumba 1 baje mynstep jong ka 20.08.2026, ki la kawang petrol bomb ïa kawei na ki ophis treikam jong ka Veterinary kaba don ka shnong Mawlangwir, South West Khasi Hills District.
Ha ka tyllong khubor ba la ïoh lum napoh ka ophis jong u Superintendent jong ki Pulit ka South West Khasi Hills District, u bah B. Jyrwa, MPS u la ong ba ha ka por kumba 10:43 mynstep, napoh ka Mawkyrwat Police Station ka la ïoh pdiang ïa ka jingtip lyngba ka phone shaphang ka jingshah kawang petrol bomb ha phyllaw jong ka Veterinary Office, kaba don ha shnong Mawlangwir, South West Khasi Hills District.
Mar mar hadien ba la ïoh pdiang ïa ka jingtip, ki pulit na Mawkyrwat Police Station ki la leit sha katei ka jaka ban pynlong ïa ka jingtohkit.Haba ki la poi sha ka jaka, ki la lap ba kawei ka petrol bomb ka la shah kut sha jrong ka tnum ïing jong ka ophis. Hynrei, katkum ka jingpeit bniah ha katei ka jaka, la ong ba ym shym la lap ïa kano kano ka jingjulor ïa ka ophis.
Katkum ka jingtohkit kaba la pynlong bad ki nongtrei jong ka ophis, la ïoh jingtip ba katei ka jingjia ka lah ban long ha ka por kumba 1 baje mynstep jong ka 20.08.2026, kaba ki briew kiba shong marjan ki la ïohsngew. Hynrei, ym shym la lah ban ithuh ne ïohi ïa ki briew kiba donkti ha katei ka jingjia.
” Ïa ka petrol bomb la lap da ki nongtrei jong ka ophis ha ka por kumba 9:30 mynstep, haba ki la wan sha ophis ban pyndep ïa ki kam ba ki dei ban trei”, ong u SP. Namarkata, ia ka ehjahar ki dang ap bad ka jingtohkit halor kane ka jingjia ka la ïaid shakhmat ban lap ïa ki briew kiba donkti.
