Nongstoiñ, Naitung 27: Katba nang mih ki sngi ki bar jylla kim salia shuh ban rung ha man la ki shnong la ha ki jaka sor ne kyndong, na ka bynta ban kamai da kaba leit tyrwa tiar haman la ki thliew ïing, ong u bah Lamphrang Dkhar uwei na ki nongïalam ka Hynñiewtrep Youth Council Marskuiñ area haba ïakren bad u nongthoh khubor.
U bah Dkhar u la pynpaw ruh ïa ka jingsngewkhia ha kaba ïadei bad katei ka bynta, ha kaba u la ong ba imat ka jingïoh lad jong ki bar jylla, ka dei na ka jingbym shimkhia jong ki nongsynshar kum ki syiem bad ki sordar. U la ong ba ha kine ki taïew ba la dep, ki la don ki bar jylla kiba wan tyrwa tiar ha shnong Marskuiñ bad u la lap ba haba ki leit sha ki thliew ïing wat lada don tang ki kynthei ki khynnah ruh ki rung beit beit haduh kamra shet ja ruh.
U la ong ba ha katei ka por u la bat ïa ki ban tohkit bad ban kylli ki wan na kano ka shnong bad kitei ki bar jylla ki la ïathuh ba ki dei kiba wan na Shillong. Haba u la kylli la ki don ne em ïa ki kot ki sla ki la pyni tang ki Adhaar card kumta u la phah leit phai noh ïa ki.
Utei u nongïalam ka seng u la ong ruh ba ka jingbym shimkhia jong ki nongsynshar hima bad ki nongsynshar shnong, ban buh da ki kyndon ba pyrkhing ïa ka jingwan rung klumar ki bar jylla ha ki shnong ki thaw, ka buh ha ka jingma ïa ki kynthei ki khynnah namar ym lah ban tip la ki dei kiba bha ne kiba sniew.
U la ong ruh ba ym lah ban len ba ki riew sniew ki kham sïan ban leh kum kiba wan tyrwa tiar kum ki jaiñ ki nep, ki tiar ïing tiar sem tang ban ïoh lad kumno ban pynbiej ïa ki kynthei ki khynnah. Nalor kata u la ong ruh ba ha kane ka juk mynta lei lei lada ki nongshong shnong ki kham ïakren pariah parai, kin sa pan ïa ki mobile number bad ha kawei ka sngi kin sa phone bad kin thok laiphew jait bad dei hangta ba lada ki bakla ban ngeit kan long kum ka jingriam ban pynjot.
U la ong ba ki lah ban pynbiej ruh ba ki lah ban don ïa ki tiar kiba bha bad ka dor ka kham tad ban ïa kiba thied na ïew na hat, hynrei ynda la thied ki tiar ki dei ki ba sniew. Kumta la kyntu ïa ki nongsynshar hima, ki nongsynshar shnong bad kiwei pat ki sengbhalang ba kin peitngor bha halor kane, khnang ba kan ym jia kano kano ka jingeh ïa ki paitbah nongshong shnong.
