Pyllait paidbah u CM ïa ka skim song pisa ïa ki nongïalehkai ba khur takma

Shillong, Naitung 27 : U Myntri Rangbah ka Jylla u Conrad K Sangma u la pyllait paidbah ïa ka skhim song pisa (Cash Award Scheme) na bynta ki nongïalehkai kiba khur takma bad wanrah nam bad burom ïa ka Jylla hi baroh kawei. Ïa kane ka skhim ba thymmai na bynta ki nongïalehkai u Myntri Rangbah u la pyllait paidbah ha ka sngi Balang ha ka jingïalang sam khusnam song pisa sha ki nongïalehkai kiba la khur takma ha ka samoi 2017-18 ha U Soso Tham Auditorium, Shillong.
Haba kren ha katei ka jingïalang u Myntri Rangbah u la ong ba ïa kane ka skhim yn sam sha ki nongïalehkai kiba khur takma manla u snem. U la pynpaw ka jingsngewkmen ba ka sorkar ba mynta ka la wanrah ïa ka sports polisi bad kadei ruh ka sien kaba nyngkong ba ki nongïalehkai kin ïoh jingïarap lyngba kane ka skhim.
U la ong ruh ba lyngba kane ka skhim ki nongïalehkai kin ïoh ban pyndonkam ban thied ïa ki tiar ïalehkai bad kiwei kiwei ki jingdonkam ha ka liang ki jingïalehkai.
U Bah Banteidor Lyngdoh Myntri ka tnad ïalehkai haba kren kum u Symbud Kongsan u la ai ka jingïaroh ïa u Myntri Rangbah u Conrad K Sangma uba ju sngap ïa ki jingkyrpad jong u bad khamtam eh ban pyntreikam ïa ka sport polisi ha kaba ka sorkar Jylla ka la ïoh ban thaw ha u 2019 bad lyngba kane kan long ka jingïarap khamtam eh ban nang kyntiew ïa ka kam ïalehkaj hapoh ka Jylla.
Ha kane ka sngi la ïoh ban sam ïa ki khusnam song pisa sha ki 11 tylli ki jait jingïalehkai kiba kynthup naduh kiba don thup ha ka Olympic bad ki bym don ruh. Kine ki kynthup ïa ka Boxing, Football, Arm Wrestling, Karate nalor kiwei kiwei.
Ha kane ka sngi la donlang ruh ki ophisar ka tnad ïalehkai, ki nongkitkam jong ki synjuk ïalehkai, ki kmie ki kpa, ki nongïalehkai bad kiwei kiwei.