U Lungsiej u markhlaw ba pynïoh kamai bun eh ha Meghalaya lap ka Nagaland University

By Mawphor Editor On Aug 11, 2026

Shillong, Nailar 10 : U Lungsiej u dei u markhlaw ba pynïoh kamai bun eh ha Meghalaya, ong ka jingwad bniah ka Nagaland University kaba la ithuh bad lum jingkheiñ ïa ka jingshongdor ki 47 tylli ki mar khlaw ba la pyndonkam da ki jaid bynriew ha kylleng ka Jylla Nagaland bad Meghalaya.
Ka jingwad bniah, ba la pynlong ha ki 20 tylli ki Shnong bad 250 tylli ki Longïing, ka pyni ïa ka jingsynñiang kaba khraw jong ki markhlaw ba la ithuh kum ki Non-Timber Forest Produce (NTFP) sha ka jingshngaiñ ha ka jingdon ka bam, ka jingsumar jingpang nala tynrai bad ka jingïoh kamai ki longïing napdeng ki Jaidbynriew riewlum ba shaniah ïa ki marklaw ha kine ki artylli ki Jylla.
Katba u lungsiej u dei uba la ai jingmih kaba bun eh na ki NTFP ha Meghalaya, u sohmarit khlaw u dei ruh uba ki Jaidbynriew riewlum na baroh arjylla ki la kheit bad uba ai jingmih kaba bun eh ha Nagaland.
Ki nongwad bniah kila shim jingthoh haduh 47 jait ki dieng bad ki markhlaw, haba bishar ba kumno ki jaidbynriew ki leit kheit, pyndonkam bad die ïa ki. Ka jingwad bniah kala buh jingthoh ruh ïa ka samoi ba lah ban ïoh ïa ki, ka jingleit kheit, ka jingpynlut por ha ka jingleit kheit bad ka jingjngai ka jaka ba ki leit.
ïa ki jaidbynriew ha Meghalaya, ka jingshem ïa ka jinglah pynmih pisa na kine ki markhlaw ka dei kaba la long doh long snam naduh ka jingpynlong marbam na la tynrai bad ka jingpynïaid ïew ïa ki hynrei ka dor ïew ka dang dei kaba dang tad bha.
Ka jingwad bniah ka shem ba bun na ki NTFP bala ithuh ki dei kiba ju pyndonkam eh ban bam bad pynkdang, bud pat sa ki lad shna dawai. ïa ki mar ba tam la die sha ki ïew shnong, kaba ai ïa ka tyllong kamai ïa kiba bun ki longïing.
Ki nongwad bniah ki ong ba ka lad kamai na ki markhlaw ka ïaid palat ïa ka jingleit die beit beit ïa ki, namar ka don ruh ka lad ban pynmih mar ba kham remdor na ki, ka jinglah ban sengkam sengjam bad aikam aijam ïa ki briew kiba im sha ki jaka ba kyndong bad ba shaniah na ki markhlaw.
Ka jingwad bniah ka pynpaw ba ka thaiñ Shatei Lam Mihngi ka don palat ïa ka 33% ki jingthung jingtep ka ri India bad kyrshan ïa palat 100 tylli ki jaidbynriew trai muluk kiba shaniah ha ki markhlaw ha ka bam bad ka kamai.