Jowai, Naitung 25: Ka ophis jong ka Divisional Soil & Water Conservation Officer, Jowai Territorial Division, Jowai mynta ka lah sngi U Blei kala pynlong da ka jingïaid Rally cum awareness programme shi bynta na ka ‘Jal Shakti Abhiyan’ halor ka phang kaba ong “Catch the Rain, Where it Falls and When it Falls”.
Ha kane ka prokram la wan ban ïashim bynta da ki khynnah skul jong ka sor Jowai kiba la pynlong ka jingïaid rally kaba la sdang na Daimasi Playground, Ladthalaboh bad pynkut ha katei ka ophisla ba la wan ban kaweh ïa ka lama da u Additional Deputy Commissioner, Jowai u P.K Boro.
La ïathuh ba ka jingpynlong ïa kane ka rally ka long kum la lad ban ai jinghikai ïa ki paidbah ba kin nang ban tyngkai ïa ka um slap khnang ba kan long jingshngaiñ jong ka lawei.
La pynsngew ba ka jingshah pynjulor julor jong ka mariang ha u khun bynriew kala jur bha mynta bad kala dei ka por ban kyndit thiah noh ban ai ka jingïada ïa ka mariang bad ka jingtyngkai ïa ka um da kaba pynrung ha ki jingmut jingpyrkhat jong ki khynnah skul ba kin sam lem ïa kane ka jingtip sa kiba ha ïing ha sem bad ha ka shnong ka tnaw.
Na ka liang u Soil and Water Conservation Officer, Jowai Territorial Division ma T. War haba kren ha kane ka sngi ula buh ka jingkyntu ïa uwei pa uwei u briew ba un don bynta lang da kaba sdang shwa naladei ha ka jingim ban tyngkai ïa ka um bad ban long kiba lehkhuid.
Ula pyntip ruh ba ka ophis Soil & Water Conservation kumba long mynta kala dei kawei na ophis kala lait na ka jingpyndonkam pla plastic bad kane kala long ka nuksa ïa kiwei. Ïa kane ka ophis kala pyrshang la shi snem mynta, ha ka juh ka por la thung ruh ïa ki sla lamet ha ki phyllaw jong ka ophis.
Ki khynnah skul kila ïashim bynta lang ha kane ka sngi ha ka jingïaid rally ki la rah lang bad ki placard ha ryngkat ka jingpyrta kiba ïadei bad ka rukom pynneh pynsah ïa ka um. Kiwei de kiba ïadonlang ki long u ma L. Pohktai, Soil & Water Conservation Officer, Jowai Plantation Division, ki ophisar, ki nongtrei ka Soil and water conservation office bad ki nonghikai skul.
Shi bynta na kane ka prokram ai jinghikai la don ruh ka jingïakop thoh essay halor ka phang “Catch the Rain, Where it Falls and When it Falls”, ïa kane ka prokram la pynïaid da u ma P. Lamare, Senior Demonstrator, Soil and Water Conservation katba ïa ki kyntien ai khublei la ïoh na ka kong E. Shylla, Assistant Soil & Water Conservation officer, Jowai Territorial Division.
