Mawkyrwat, Nailar 09: Ka Hill Farmers Union (HFU) hapoh ka jingïalam u Bah Commander Shangpliang uba dei President ka Hill Farmers Union (HFU) Central Body ka la leit jurip ha South West Khasi Hills District namar ka jingïap khlam jong ki sniang.
Ha kane ka jingleit jurip, ki nongïalam jong ka HFU ki la leit sha shnong Nongbrei – Nongdom ha ka thaiñ shilliangum jong ka South West Khasi Hills District, ha kaba ha kane ka jingleit jurip u bah Commander Shangpliang u la lap ba ki don bun ki sniang jong ki Nongri jingri kiba dei ruh ki nongrep kiba la ïap namar ka jingpang.
Haba kren ha ki lad pathai khubor, u Bah Commander Shangpliang u la ïathuh ba ha ka jingïoh ban wad jingtip bad ïoh ban ïakren bad ki ophis jong ka Veterinary bad ki la pyntip ba kane ka jingïap jong ki sniang ka dei namar ka jingpang African Swine Flu (ASF).
Kumta u bah Commander Shangpliang u la dawa ban phah noh ïa ki injekshon khnang ban ïada na ka bynta ki sniang kiba dangim bad kiba la sdang kem pang.
Ym tangkata, u la dawa ruh na ka sorkar ba kan siew bai lutksan bad kumjuh ruh ban buh ïa ka jaka eksamin lane ka jaka test ïa ki sniang kiba wan na shabar ha thaiñ Jorabat.
U la pynpaw ruh ïa ka jingsngewphylla haba mynta ka seng ka la ïoh jingtip ba ka don kata ka Direct Entry na ka bynta ki sniang kiba wan na shabar bad u la ong ba haba don da ka direct entry ki lah ruh ban wan kit ïa ki sniang ïap bad kiba lah ban wankit jingpang bad shah ktah pat ki sniang ha ka jylla.
