Pynkhlaiñ ka sorkar da ki aiñ ban ïakhun pyrshah jingpyndonkam bakla ïa ki phlim lyngba ki lad online

New Delhi, Nailar 08: Ka Sorkar ka la pynkhlaiñ ïa ki aiñ bad ka rukom treikam ban ïakhun pyrshah ïa ki jingpyndonkam beaiñ ïa ki phlim lyngba ki lad online, kynthup ïa ka jingpynsaphriang khlem jingbit ïa ki phlim lyngba ki nongpynïaid kum ka Telegram. La pynkylla ïa ka Cinematograph Act, 1952 lyngba ka Cinematograph (Amendment) Act, 2023 ban wanrah ïa ki kyndon ba kyrpang ban tehlakam ïa ka jingring tuh bad pyni ïa ki phlim khlem jingbit. Ka Section 7(1B) (ii) ba la pynrung thymmai ka ai bor ïa ka Sorkar, hapoh ka Section 79 (3) jong ka Information Technology Act, 2000, ban shimkhia pyrshah ïa ki nongpynïaid kiba pyni ïa ki prokram ba la pyndonkam khlem da ïoh jingbit na ki nongshna.
Ka Section 79(3) (b) jong ka IT Act, 2000 ka ailad ban bthah ka Sorkar ïa ki nongpynïaid ban weng/pynsangeh ïa ki prokram kiba be-aiñ. Hapoh ka Information Technology Rules, 2021, ki nongpynïaid ki dei ban wengnoh ïa kino kino ki prokram kiba pynkheiñ ïa kano kano ka aiñ kaba dang treikam mynta katkum ka por ba la wanrah sha ka jingtip jong ki la ka long lyngba ka hukum jong ka ïingbishar lane lyngba ka jingpynbna da ka sorkar ne ka tnad jong kaba la ai bor.
Hadien ba la ïoh ïa ki jingujor ha kaba ïadei bad ka jingpyndonkam ïa ki phlim khlem da ïoh jingbit, ka Tnad ka la pynmih ïa ki jingpynbna sha ki nongpynïaid da kaba bthah ïa ki ban weng ne pynsangeh noh kloi ïa ki prokram kiba ym lah ban pyndonkam katkum ka aiñ. Ka sorkar ka la ai bor ïa u Joint Secretary (Films), ka Tnad Information & Broadcasting ban phah ïa ki hukum sha ki nongpynïaid ban weng ïa ki prokram hapoh ka Information Technology Rules, 2021 bad ka Cinematograph Act, 1952. La sdang ruh ïa ka rukom treikam ha ka Tnad Information & Broadcasting ban pdiang ïa ki jingujor na ki trai jong ka copyright ha kaba ïadei bad ki kopi thok jong ki phlim kiba don ha ka internet bad ban pynmih ïa ki jingpynbna sha ki nongpynïaid ban khanglad ïa ka jingrung jong kum kine ki prokram.
Ka sienjam pyrshah ïa ka jingpyndonkam khlem da ïoh jingbit
Katkum ki kyndon jong ka aiñ ba la kdew haneng, la bthah ïa ki nongpynïaid ban pynduhnoh ïa 7,393 tylli ki URL, ba kynthup 1,263 tylli ki website bad 4,996 tylli ki Telegram channel na ka bynta ka jingtuh ïa ki phlim.
Ïa kane ka jingtip la ai da u Myntri Khynnah badei khmih ïa ka Tnad Information and Broadcasting bad Parliamentary Affairs, u Dr. L. Murugan, ha ka jubab ba shu thoh ïa ka Jingkylli ba la kylli da u Balashowry Vallabhaneni ha Lok Sabha.