Yn mihkhmat 18 ngut ki rang & thei siat khnam ka Ri-Bhoi sha ka M’laya State Archery C’ship 2026

Nongpoh, Nailar 07: Ka Ri Bhoi Archery Association (RBAA), kaba dang shu seng thymmai bad kaba la ioh ruh ka jingithuh kum ka Association ba la pyniasoh (Affiliated) bad ka Meghalaya Archery Association, ka la pynkhreh ban phah ïa ki nongsiat khnam jong ka ban shim bynta ha ka Meghalaya State Archery Championship 2026.
Kane ka lympung ïalehkai kan long naduh ka 10 tarik haduh ka 14 tarik u Nailar 2026 ha ka madan jong ka Sports Authority of India (SAI) ha Shillong.
Haba kren sha ki lad pathai khubor, u President ka Ri Bhoi Archery Association, Bah Sumarlang Swer, u la ong ba ka Association ka la shim ïa kane ka sienjam ban plie lad ïa ki khynnah nongsiat khnam na Ri Bhoi ba kin pyni ïa la ki sap bad ban ïakhun bad kiwei pat ki nongïalehkai na kylleng ka jylla.
U la pyntip ba ki don 18 ngut ki rang bad ki thei siat khnam kiba kynthup ïa ki Junior bad Senior Category, kiba yn mihkhmat ïa ka Ri Bhoi ha katei ka jingïakhun.
U Bah Swer u la ong ruh ba kine ki nongïalehkai ki la ïoh jinghikai ba kyrpang ha Shillong lyngba ka jingïarap jong ka Meghalaya Archery Association. Nalor kata, ka Ri Bhoi Archery Association ka la pynlong ruh ïa ki jingïakilan met bad jinghikai ha madan Mawtnum lyngba ki coach jong ka ban pynkhreh bha ïa ki shuwa ba kin leit ïashim bynta ha katei ka lympung.
Ha kaba kut, u Bah Swer u la pynpaw ïa ka jingkyrmen ba ka kynhun kan lah ban wanrah nam bad burom ïa ka Ri Bhoi District. U la ai khublei ruh ïa ki coach, ki kmie ki kpa bad baroh kiba la kyrshan bad trei shitom ban pynkhreh ïa kane ka kynhun nongsiat khnam.