Manla u snem palat 8 hajar ngut ki briew ki la duh la ka jingim na ka daw ba pyndonkam ïa u duma

Shillong, Nailar 06: Ka South West Garo Hills ka la long kawei na ki distrik kaba la pyni ba ka khlaiñ bad kaba heh duh jong ka sorkar Meghalaya ban ïakhun pyrshah ïa u duma, ha ka jingrakhe ïa ka World No Tobacco Day (WNTD) 2026 kaba don ka phang “Tobacco! Business of Death.”
La pynlong ïa kane ka jingpynshai hapoh ka jingpeit jong ka Tobacco Free Educational Institutions (ToFEI) ha ka jingïadonlang haduh 9,312 tylli ki skul, 55 tylli ki college bad palat hynriew lak ki khynnah skul ba har rukom ka jylla ki la shim bynta shitrhem. La ïoh lum palat 54 lak kiba soi kyrteng na ka imlang sahlang ban kyrshan ïa ka imlang sahlang kaba lait na u duma.
La don haduh 625 tylli ki skul ha kane ka distrik kiba la pynlong ïa ki rally pyrshah ïa u duma, ha kaba ki khynnah skul ki don haduh 19,916 ngut, kiba la mih sha lynti ban pynsaphriang ïa ka jingma jong u duma. La lum 55,448 tylli kiba soi kyrteng na ki paidbah ban pyni ka jingkyrshan ba radbah jong ki.
La don ha jingïaroh bad jingkren na ki ophisar jong ka Deputy Commissioner, ka Anendya Raajsshre, ha kaba ka la ïaroh ïa ka jingïatylli ki bor pynïaid distrik, ki ophis skul, ki medical cell bad ki nonghikai ban pynlong ïa kane ka jingpynsaphriang kaba jop.
Katba u District School Education Officer, u A.K. Sheikh u la ong ba ka jingshim bynta kaba khlaiñ ki khynnah ka pyni ïa ka jingshem phang bad ka jingkut jingmut ban pynlong ïa ka lawei kaba koit kaba khiah.
U State Nodal Officer, u Nabaneeta D. Mawrie, u la pynkynmaw ba u duma u shim noh ïa ka jingim briew kumba palat 8000 ngut man u snem ha ka jylla, kaba pyni ba ka jingpynshai ka long kaba donkam shisha. Ka State Project Director, ka Richa Kulkarni ka la kular ba kane ka jingïatreilang kan pynlong ïa ka pateng ban wan kaba lait na u duma.