Ka dei tang ka jingsdang ong u Bah Ardent, da ki hajar ngut mih ki paidbah ban ïaid tawiar sawdong ka Secretariat

Shillong, Nailar 06 : Da ki hajar ngut ki paidbah na kylleng ki bynta jong ka Rilum Khasi – Jaintia kynthup ïa ki MLA bad MDC ka VPP ki la shim bynta ha ka jingïaid paidbah kaba jai jai nakhmat Secretariat hapoh ka jingïalam jong u President ka Voice of the People Party, Bah Ardent Miller Basaïawmoit ha kane ka sngi Palei.
Khyndiat kynta shwa ba ki paidbah kin poi sha ka Secretariat, na ka liang ki bor distrik bad ki bor pulit ki la ker lypa mar shilliang ka surok kyrpang na bynta ki nongïaid paidbah bad shilliang pat ban ïaid ki kali khnang ban ym thut ka leit ka wan jong ki nongleit nongwan. Kane ka sienjam ka la pynlong ïa ki bor distrik bad kumjuh ki bor pulit ban ïoh ïa ka jingïaroh kaba khraw wat na ki paidbah kiba wan shim bynta ha katei ka jingïaid paidbah.
Hapdeng ka jingpahara kaba jur la ïohi pat ba ka jingïaid paidbah ka long kaba jai jai bad kaba ïaid beit naduh kaba sdang bad tad haduh ban da wai.
Na ka liang u Bah Ardent haba kren sha ki paidbah hadien ba ki la dep ban ïaid paidbah sawdong ka Secretariat, u la ong ba katei ka sienjam ba ka party ka shim ryngkat ki paidbah ka long ban pynpaw ïa ka jingpyrshah halor ka jingkynnoh ba ka Sorkar jylla kam shimkhia ïa ki 10 tylli ki mat ba kongsan ba ka party ka buh.
Da kaba pynpaw ba kane ka dei tang ka dak ba ka sorkar kan ïohi bad ïohsngew ïa ka sur jong ki paidbah, u Bah Ardent u la ong, “Ngim kwah ba ka Sorkar kan khot ïakren ïa ngi hynrei ngi kwah ban pynpaw ïa ka jingsngew jong ngi. Ho-oid u Myntri Rangbah u la ong ba ka Iing Dorbar kadei ka jaka kaba biang tam ban ïakren hynrei san sngi phi khot long Dorbar kiba bun bha ki mat hynrei ka por phi ai tang 7-10 minit, lah mo ban pyndep ïa kine ki mat,” ong u Bah Ardent.
Shuh shuh u la ong ruh ba ki don kiba pynsngewthuh bakla ba ki nongïalam kaVPP kim ju kren ha Iing Dorbar. “Lada phi ong ba phi kloi ban ai por ba kylluid, ngin sei lut ïa ki mat hapoh Assembly,” u la ong.
Shuh shuh u la pynpaw ruh ka jingkmen ba ki paidbah ki la pdiang ïa ka jingkyrpad jong ka party ban pynlong ïa ka jingïaid paidbah kaba jai jai bad kaba kut khlem kano kano ka jingjïa bymsngewtynnad.
“Ha kine ki sngi ki la don shibun ki nong kynthoh ïa ka VPP, ba ka dei ka seng kaba pynkulmar hynrei kane ka jingwan jong phi ka pynshisha ba ki mat ba ngi rah na ka por sha ka por ki long shisha ki jingeh ba ka Jaidbynriew ka ïa kynduh. Ngi pynlong ïa kane ka jingïaid paidbah jong ngi ha ka sngi long trei, kam dei ka sngi shuti kumta don kito kiba don ha ki kam kim shym lah ban don bynta lang,” la bynrap biang u Bah Ardent.
Shuh shuh u ong, “Kane kadei ka jubab ïa kito kiba kynthoh ïa ka VPP ba kadei kaba pynshit ïa ki paidbah. Kane ka jinglong ba jai jai kadei ka sakhi ba ngim dei ki briew ba kwah ban pynmih jingkulmar, ngi don ïa ka nongrim kaba skhem kum ki nongïalam ka VPP ba ngin ieng ban ïada ïa ka hok long trai jaka bad ki 10 tylli ki mat ba ngi la pynsngew sha ka Sorkar nalor kiwei pat ki mat.”
Ha kajuh ka por u President ka VPP u la ong ba ka sorkar ka kob ba ka aikam ïa ki samla hynrei ki Home Guard ki ïoh tulop shisien ha ka saw bnai. “Kine ki Home Guard ki trei shitom ha ki kam jong ki hynrei ki ïoh tulop shisien 4 bnai,” u la ong.
Shuh shuh u ong ba wat kiba trei contractual bad casual ki ïoh tulop shisien lai bnai.
“Ka Sorkar ka kob ba ka ai kam, lada ka jingaikam ïa ki khun samla ka dei ban siew tulop tang shisien 3 bnai kam don jingmut ban sngewsarong ïa ka jingaikam jong phi,” u la ong.
U Bah Ardent u la dawa ruh ïa ka sorkar ba ka dei ban pynsangeh ïa ka public hearing bad ruh ban pynsangeh noh ïa ki coke plant kumjuh ki karkhana dewbilat. “Ngi kwah ba ka Sorkar kadei ban pynsangeh shwa ïa ki Coke Plant bad Cement Factory, kein noh lah biang shwa kato,” u la ong.
Ha kajuh ka por u la ong ba kum ka party ki la ai ruh da ka jingthoh sha u Chief Secretary ban pyndam noh ïa ka eksam ïakhun kam ba la pynlong da ka DSC West Jaintia Hills.
U President ka VPP, u Bah Ardent Miller Basaïawmoit, u la kynthoh jur ïa ka rukom pyntrei ïa ka Shillong-Dawki Road, da kaba ong ba wat hadien bun snem ka project kam pat dep bad ki paidbah ka thain Riwar ki dang hap ban mad ïa shibun ki jingeh.
U la ong ruh ba ka Sorkar ka ju kren shaphang ki project kiba heh bad kiba kot da ki spah klur tyngka, hynrei ki nongshong shnong ki dang hap ban ïaid lyngba ki surok kiba sniew bad kiba pynjynjar ïa ka leit ka wan man ka sngi.