Pyni ki samla pule ïa ki sap kyrpang ba ki ki don bad kular ban ym ktah ïa ki jingdih basniew

Mawkyrwat, Nailar 06: Ka Sngap Syiem College, Mawkyrwat ha ryngkat ka jingïatreilang bad ka ophis jong ka District Youth Officer, West Khasi Hills District, Nongstoiñ, ka Red Ribbon Club (RRC), ka National Cadet Corps (NCC), ka National Service Scheme (NSS) ka la pynlong ïa ka prokram “Nasha Mukt Yuva for Viksit Bharat” kaba la pynlong ha Sngap Syiem College, Mawkyrwat Conference Hall.
Ha shwa ban pynlong ïa ki prokram bapher bapher ka la don ka jingïalang ba lyngkot ha kaba la ïoh shwa ka jingkren na u bah Shaiborlang Lyngdoh bad na u Babu S. Lyngdoh ha kaba ki la batai bniah shaphang kane ka prokram ryngkat ka jingthmu ban pynsngewthuh ïa ki samla halor ki jingsniew ban ïaleh pyrshah ïa ki jingdih ba pynbuaid da kaba don ka jingïatreilang kaba koit ba khiah, bad bna lait na ki jingsniew ka donkam ruh ïa ki jingïalehkai namar ka pynshlur ïa ki samla pule ban long ki nongshong shnong kiba don ka jingkitkhlieh bad ki samla kiba trei shitom ha kaba tei ïa ka imlang sahlang kaba lait na u drok hapoh ka jingthmu jong ka Viksit Bharat.
Kawei ka bynta kaba kongsan jong kane ka prokram ka long ka jingkular paidbah hapoh ka “Nasha Mukt Yuva for Viksit Bharat”, kaba la ai jingtip sha baroh ki nongïashimbynta halor kane ka jingrakhe da kaba ki samla pule ki la kular da kaba shim ïa ka pledge ban ym dih ïa kino kino ki jingdih kiba pynmynsaw ne pynbuaid, ban pynshlur ïa kiwei pat ban kiar na ki jingdih buaid, ban pynphriang ïa ka jingtip shaphang ki jingma kiba mih na ka jingdih buaid, bad ban noh synñiang shitrhem ban tei ïa ka ri India kaba koit ba khiah, kaba donbor, bad kaba lait na ki jingdih buaid.
Ha kane ka prokram la pyni ïa ki jingïakob kiba bun jait, kiba kynthup ïa ka jingrwai tynrai, ka shad tynrai, ka Mime Act, ka jingïakob dro dur, ka jingïatai nia/jingkren, ka jingïakob Short Film/Reel, ka Jingthoh Slogan, bad ka Slam Poetry. Kumba 200 ngut ki samla pule ki la ïashimbynta da ka jingkmen ha ki prokram bapher bapher, da kaba pyni ïa ka jingstad, ka sap, bad ka jingaiti jong ki ban pynphriang ïa ka khubor jong ka imlang sahlang kaba lait na u drok.
Ka prokram ka la kut da kaba jop, ha kaba ki nongïashimbynta, ki nonghikai, bad ki nongpynïaid ki la pynskhem biang ïa ka jingkular jong ki ban thaw ïa ka jingsngewthuh pyrshah ïa ka jingdih buaid bad ban pynkup bor ïa ki samla ban noh synñiang sha ka jaitbynriew kaba koit ba khiah, kaba khlaiñ, bad kaba kiew shaphrang.
Haba kut jong ki prokram baroh, la ïoh ban sam ïa ki khusnam sha baroh ki nongjop kiba la ïoh ban ïashimbynta ha kane prokram jong ka, “Nasha Mukt Yuva for Viksit Bharat”.