Mawkyrwat, Nailar 06: Ka Mawkyrwat District Sports Association (MDSA) ha ryngkat ka jingïatreilang bad ka ophis jong ka District Sports Officer (DSO), South West Khasi Hills District mynta ka sngi ka 6 tarik u ‘Nailar, 2026 ka la ïoh ban plie pyrda ïa ka lympung ïalehkai kynjatbol kaba la tip kum ka 2nd, 3rd bad 4th Division Football League 2026-27 hapoh madan Artificial Turf, Nonglang, South West Khasi Hills District.
Haba phai ha ki jingïalehkai, kaba dei ha ka 2nd Division Football League 2026-‘27 ka Mawjai Sports Club ka la lah ban pynliem noh ïa ka Rangmaw Sports Club da 2 – 1 kol , katba ha ka jingïalehkai jong ka 3rd Division Football League 2026-‘27 pat ka Mawmerang Sports Club ka la ïakhaid bad ka Phlangkynshi Sports Club mar 0 kol bad kumjuh ruh ka Banangroi Football Club ka la ïakhaid mar 2 kol bad ka Brothers United Football Club.
Ha kane kajuh ka sngi ka Mawkyrwat District Sports Association (MDSA) ha ryngkat ka jingïatreilang bad ka ophis u District Social Welfare Officer (DSWO), South West Khasi Hills District ka la ïoh ruh ban sdang ïa ka jingïalehkai 4th Division Football League 2026-‘27 kaba dei jong ki khynnah ba khatphra snem hapoh ka phang “Play For Glory, Say No To Drug”.
Ha kane ka lympung ka Nongdiat Sports Club ka la khur ïa ka jingjop hadien ba ka la lah ban pynliem noh ïa ka Phottdei Sports Club da 2 – 0 kol.
Ïa kane ka lympung ïalehkai kynjatbol jong ki saw tylli ki Division, la wan ban plie pyrda da ka kong A.L. Mawlong, IAS, Deputy Commissioner jong ka South West Khasi Hills District ryngkat ka jingdonlang ka kong D. Marweiñ, District Sports Office (DSO), South West Khasi Hills District bad u bah E. Tariang, District Social Welfare Officer (DSWO), South West Khasi Hills District ki nongkitam ka MDSA bad kiwei kiwei.
