Na ka 23,49,645 ngut mynshwa sha ka 21,69,243 ngut mynta ki nongthep vote ha ka draft Electoral Roll 2026

Shillong, Nailar 05 : Ka Office jong u Chief Electoral Officer, Meghalaya, ka la pynmih ïa ka Draft Electoral Roll 2026 na bynta baroh 60 tylli ki Assembly Constituencies hapoh ka Special Intensive Revision (SIR) 2026. Ha kajuh ka por la pynbna ruh ba ïa ka jingtyrwa ban pynbeit lane ‘Claims bad Objections’, ka la sdang naduh ka 05 tarik Nailar haduh ka 04 tarik Nailur, 2026.
Haba pynbna ïa kane, u Chief Electoral Officer ka Jylla, Dr. BDR Tiwari u la ong ba ka SIR 2026 ka la kynthup ïa ka jingleit pynshisha kaba bniah haman la ki iing ha baroh kawei ka jylla, bad la dep ban sam bad digitize 100 percent ïa ki Enumeration Forms jong baroh 23,49,645 ngut ki nongthep vote.
Na baroh 23,49,645 ngut ki nongthep vote kiba don ha Meghalaya shuwa ka Special Intensive Revision (SIR) 2026, 7,75,665 ngut (33.01%) la lah ban pynïasoh ïa ki record jong ki hi bad ka SIR 2005, bad la buh ïa ki hapoh ka Self category.
Sa 11,70,792 ngut (49.83%) la pynïasoh bad ki record jong ki kmie ki kpa ne ki kpa tymmen kiba don ha ka SIR 2005, bad la buh ïa ki hapoh ka Progeny category.
Katba 2,22,786 ngut (9.48%) kim shym la lah ban pynïasoh bad ki record jong ka SIR 2005, bad la buh ïa ki hapoh ka “No Mapping” category. Kine kin hap ban shah bishar bad pynshisha bad ha ka por ban pyndep ïa ki Claims bad Objections.
Ha ka por jong ka enumeration, la ithuh ruh ïa 1,80,402 ngut (7.68%) kiba hap hapoh ka Absent, Shifted, Deceased and Duplicate (ASDD) category.
Na kine, 81,490 ngut (3.47%) la ithuh kum kiba la khlad noh, 45,011 ngut (1.92%) kum kiba ym lah ban lap ne absent, 42,532 ngut (1.81%) kiba la kynriah shong shnong shawei pat, 4,668 ngut (0.20%) kiba la kyntait ïa ka Enumeration Form ne kiwei pat ki daw, bad 6,701 ngut (0.29%) kiba la don lypa ha ka electoral roll jong kiwei ne kum ki duplicate.
Hadien ka jingleit rung man la ki thliew iing, ka Draft Electoral Roll 2026 ka don 21,69,243 ngut ki nongthep vote. Na kine, 10,53,039 ngut ki dei ki shynrang, 11,16,199 ngut ki dei ki kynthei, katba 5 ngut ki dei ki Third Gender.
Ka Election Department ka la kyntu ïa ki nongthep vote ban peit bniah ïa ki kyrteng bad ki jingtip jong ki ha ka Draft Electoral Roll bad ban leh ïa ki Claims ne Objections lada donkam hapoh ka por ba la buh.
Ha kajuh ka por, ka Election Commission of India ka la mynjur ban pynbun ïa ki Polling Stations ha Meghalaya da 86 tylli, kaba pynkiew ïa ka jingdon jong ki Polling Stations na 3,551 sha 3,637 tylli.
Ka jingpynbun ïa ki Polling Stations ka thmu ban pynsuk ïa ki nongthep vote bad ban pynbha ïa ka jingpoi sha ki jaka thep vote.
La kyntu ruh ba ki paidbah ki lah ban peit ïa ka Draft Electoral Roll ha ki ophis jong ki DEO, ERO, AERO bad ha ki Polling Stations, bad ban phah ïa ki Claims ne Objections hapoh ka por ba la buh, kata naduh 5 Nailar haduh 4 Nailur 2026.
La kyntu ruh ba ki nongthep vote ki lah ban peit ïa ki kyrteng jong ki lyngba ka Voters’ Service Portal, ka website jong ka CEO Meghalaya, ka ECINET App, lyngba u Booth Level Officer (BLO) jong ki, ne ha ka ophis jong u Electoral Registration Officer (ERO).