Shillong, Nailar 5: Ha ka sienjam kaba khraw ban khanglad ïa ka jingbret jaboh bad ban kyntiew ïa ka kam jngohkai pyrthei kaba don ka jingkitkhlieh, ka bor pyniaid district jong ka East Khasi Hills ka la khang pyrshah ban shet jingshet ha rud surok bad ban bret jaboh khlem da kheiñ snep ha ki jaka jngohkai pyrthei, ki jaka paidbah bad ki view point ha baroh kawei ka district.
U District Magistrate u Abhilash Baranwal u la pynmih ïa ka hukum khang katkum ka kyndon 163 jong ka Bharatiya Nagarik Suraksha Sanhite (BNSS), 2023, kaba treikam mardor hadien ka jingkiew ka jingsngewkhia halor ka jingpynjot ïa ka mariang ha shilynter ka lynti jngohkai pyrthei ba pawnam jong ka Shillong-Mawkdok-Sohra bad kiwei kiwei ki jaka jngohkai pyrthei.
Ki bor pyniaid ki la ong ba ka jingshet jingshet ha rud surok da kaba pyndonkam da ki dieng thang, rnga, ki tyndong LPG lane kano kano ka umphniang, ryngkat bad ka jingbret jaboh bad bret pathar ïa ki plastic, ki jaboh jabaiñ, ki bilor, ki tin bad kiwei kiwei ki jaboh jabaiñ, ka la ktah ïa ka jingkhuid jingsuba, ka la pynmih ïa ki jingkhanglad ha ka leit ka wan bad ka jingma na ka ding, nalor ba ka la pynsniew ïa ka dur jong ka Meghalaya bad ïa ki jaka jngoh kai pyrthei.
Hapoh katei ka hukum, la khang ban shet jingshet ha ki rud surok, ki jaka peitkai bad ki jaka paidbah.Ka bor pyniaid ki la khang ruh ban bret jaboh ha ki khlaw ba jyrngam, ki jaka um, ki nala um bad ki jaka rud surok.
Ki heh ophisar ki la maham ba ki nong pynkheiñ aiñ kin ngat ha ka kyndon 223 jong ka Bharatiya Nyaya Sanhita (BNS) 2023, bad kiwei kiwei ki aiñ kiba treikam.
Ka hukum kaba la pynmih ïa ka ex parte namar ka jingkyrkieh jong ka jinglong jingman, ka la treikam noh mardor bad kan dang treikam haduh ban da mih kiwei pat ki hukum.
Ka bor pyniaid district ka la kyrpad ïa ki nongjngohkai pyrthei, ki nongshong shnong bad ki nongshim bynta ban ïatreilang ban pynlong ïa ka East Khasi Hills kaba khuid bad ban pynneh pynsah ïa ka nam jong ka Meghalaya kum ka jaka jngohkai pyrthei kaba neh.
