Yn lum ka Sorkar da ka jingïalang halor ka jingpynkynriah ïa ki Harijan na them ïew Mawlong

Shillong, Nailar 5: Ka Sorkar Jylla kan sa lum ïa ka jingïalang jong baroh ki tnad sorkar mynta u bnai ban ïatai sani halor ka jingsahteng jong ka mat ban pynkynriah ia ki Harijan na Them Iew Mawlong, ong u Symbud Myntri Rangbah ka Jylla uba khmih ïa ka Urban Affairs u Ma Sniawbhalang Dhar hynne ka sngi Balang.
Haba ïakren bad ki nongthoh khubor, u Ma Sniawbha ula ong, ba lah dep ban bthah ïa ki ophisar ba kin ai ïa ki jingpyntip bad ki kaiphod na baroh ki tnad sorkar kiba dei khmih hashwa ban long katei ka jingïalang.
“Ngi lah long kiba la pynkhreh ban pynlong ïa ka jingïalang, lehse ha ka taiew kaba khatduh jong une u bnai. Nga lah dep ban ïakren pynbeit bad ki ophisar na ka tnad ba kin ai ia ki jingtip kiba bniah bad ïa ki kaiphod ba dang shen ba ki tnad sorkar ki bapher bapher” ong u Ma Sniaw.
“Ngin sa don ïa ka jingïalang ban ïatai sani bha halor katei ka mat ha ka taiew ba khatduh jong u Naialr” ula bynrap.
Haba kylli la ka Harijan Panchayat Committee ruh kan don lang ha katei ka jingïalang kaba nyngkong, u Symbud Myntri Rangbah ula ong ba katei ka jingïalang kan dei thik tang na ka bynta ki tnad sorkar.
“Ka jingïalang kan long shwa tang hapdeng jong ki tnad sorkar bad ngin sa khot ruh ïa ki briew na ka liang ka jingki” ong u Bah Dhar.
Ula ong, ba ka sorkar ka dang ïaleh ban ïoh ïa ka kaiphod kaba pura ka ban kynthup ha baroh ki liang jong katei ka mat.
“Ngi ngin sa lum ïa baroh ki kaiphod kiba bniah hapoh jong ki tnad sorkar bad ïa ka kaiphod hapdeng ki tnad sorkar bad ka Harijan Colony bad ka kaiphod hapdeng ki Harijan, ka Sorkar bad ka Tnad Defence. Kumta, la kumno kumno nga lah dep ong, ïa ki ban long kiba la pynkhreh lut nadong shadong. Ha ka taiew ba khatduh jong u Nailar, ngin sa don ïa ka jingïalang halor katei ka mat” ula ong.
Haba kylli balei ym shym la lah ban pynbeit ïa katei ka mat mynta la bun snem, u Ma Sniaw ula kubur ba kane ka mat ka dei kaba jwat hynrei la shim ïa ki lad ban lah ban pynbeit noh ïa katei ka kam.
“Hooid, ka dei ka mat kaba la sahteng bha hynrei ka dei kane kaba ngi lah ïai pyrshang. Naduh ba kad ei ka mat kaba la sahteng kam long kaba suk hynrei ngi lah pyrshang kat kaba lah ban pynbeit noh” ong u Ma Sniaw.