Mynta yn sdang ka kylla ba-ar jong ka Shillong Premier League, yn ïaknieh ka Rangdajied bad Sawmer

Shillong, Nailar 03 : Ka kylla ïalehkai kaba ar (second Round) jong ka Shillong Premier League 2026 kan sdang biang mynta ka sngi Ba-ar, ha kaba ki artylli ki kynhun ba khlainbor jong ka Rangdajied United FC bad ka Sawmer SC kin ïa mih madan ban ïa knieh ïa ki lai point ba pura.
Kane ka jingïakhun kan long ha ka por 4:00 baje nohphai sngi ha madan SSA Stadium, First Ground, Polo.
Haba kyrtiang dien ha ka kylla ïakhun ba nyngkong , ka Sawmer SC ka la mad ïa ka namrem kaba long tang da 1-0 hakhmat ka lahduh ka samoi ïalehkai ba la dep, ka Langsning FC. katba ka Rangdajied United FC hapdeng ka jingïaklhun kaba tyngeh ka la lah ba kan ïakhaid da mar shi kol bad ka MLP FT.
Kum ka kynhun, ka Rangdajied ka dei ka klob kaba wan ba-ar kumba hynniew sien ha kane ka lympung bad ban rah teng shisien ha ka samoi ialehkai 2013.
Ha kane ka samoi ïalehkai kaba mynta, kum ka klob ka la pyrshang ban pynkhlain ïa la ka kynhun ha kaba u Dameki Khongstia u dei u khynnah ïalehkai ba kynsai bad ba tbit tam ryngkat ka jingdon u Henryford Nongneng uba la wan na Shillong Lajong FC, kaba la ïarap ban kham pynskhem bha shadien ïa kane ka kynhun.
Haba phai sha ka Sawmer SC, na ka jingïakhun kaba la dep ka wat ba nyngkong ka la lah shisha ba kan sei ïa ka buit ïalehkai ba kynsai jong ka, kaba don ruh ki khep ba i kumba kan lah ban pynkyndit ïa ka Langsning.
Kum ka kynhun, ka Sawmer SC ka don ruh ïa ki kato katne ki rang ïalehkai ba thymmai ba ka la pynrung sha la ka kynhun kum u Raikutshisha Buam bad u Banteilang Lyngdoh, bad ha kane ka jingïakhun ka shi kol ba ki la shah thep ha ka Langsning FC ka dei tad haduh ka minit kaba 81.