Khot ïatainia ka HDYC ïa ki myntri ka sorkar MDA halor ka myntoi bad duhnong

Shillong, Nailar 02: Ka Hynñiewtrep Youth Development Council (HDYC) ka khot bad kob ia ka Sorkar Meghalaya Democratic Alliance (MDA) ba kan phah ïa ki Myntri sorkar khamtam eh ïa kito ki Myntri kiba ha khmat bha ban ïatai nia bad ka seng halor ki jingïoh nong bad ki jingduh nong jong ka jingdon ki karkhana pynmih dewbilat ha Jaiñtia Hills District.
Haba kren sha ki lad pathai khubor u President ka seng u Bah Wyraiwan Sohtun u la kynthoh jur halor ka jingkren jong u Symbud Myntri Rangbah ka jylla u Bah Prestone Tynsong uba khmih ruh ïa ka tnat Kam Pohïing ka sorkar jylla uba la ong ba ka jingwan jong ki karkhana pynmih dewbilat ha Jaiñtia Hills ka la wanrah shibun ki jingmyntoi ïa ka ioh ka kot jong ka Jylla, kumta na ka liang u Bah Sohtun u la kyntu ïa ka Sorkar ba kan pynbeit ïa ka tarik, ka jaka ban ïatai nia naba ka seng ka la long kaba la pynkhreh.
U Bah Sohtun u la kynnoh ruh ba ha ka jylla ki la don kita ki Goonda Raj kiba kwah beit ban pynurlong kat kaba kwah da ki heh spah ne Capitalist, namar, u la ong ba lada ym dei kumta, kumno ha ka ri synshar paidbah kiba pyrshah ïa ka jingbishar paidbah ka Shree Cement ha Daistong, Lum Syrman East Jaiñtia Hills District, ym shym lah shah satia ba kin kren he shimbynta ha kane public hearing.
U la buh ruh ka jingkylli la ka Meghalaya kadei ka jylla synshar paidbah ne kadei ka jylla synshar donbor (Dictator) bad u kynthoh jur ruh ba kumba la ïohi ba la shu pyndonkam da ki bor pulit ban kawang lyer pynsat khmat bad da kaba bom da tied da ki lathi, kane ka pyni ba ka jylla ka don ïa ka Sorkar ba synshar donbor.
U la kynnoh ruh ba ka Sorkar MDA ka la phah ïa ki ophisar, phah khambun ki pulit bad kiwei kiba ïashah bad kwah ban pynurlong ïa ka jingkwah ka Shree Cement ban pynjot pynjulor ïa ka mei mariang ha katei ka thaiñ.
Haba ong ba ka public hearing jong ka Shree Cement ka la long ha ka sien kaba lai, u Bah Sohtun u la ong ba ka seng ka la dep tip lypa kam don jingmut ban leit sha ka jingbishar paidbah namar ka la dep tip lypa ban shah khang lad ban shimbynta ha kine ki jingbishar paidbah.
U Bah Sohtun u la ong ha ka public hearing ba mynshwa la shah khang lynti da ki trok bumper bad mynta ki la tuh syndon ïa ka surok da ka JCB bad kumta ka seng ka pynrem jur ïa kine baroh ki jingleh ka Sorkar, ki pulit bad ka jingleh donbor ka Shree Cement kaba kwah ban buh ïa ka plant jong ka ha ka jaka ba heh 2 spah hectare hynrei kaba don jingthmu ban pynïar haduh 6 spah hectare.
Haba kylli haduh katno tylli ki karkhana pynmih dewbilat ki don ha ka thain Jaintia Hills haduh kine ki sngi bad iano ki ai jingmyntoi, na ka liang u President kaHDYC u la ong ba kumba ka long haduh mynta ki la don haduh 9 tylli ki karkhana ha Jaintia Hills.
“Ki karkhana pynmih dewbilat kiba don ha Jaiñtia Hills ki long ka Star Cement, Ka Top Cem, ka Max Cement, ka Dalmia Cement, ka Amrit Cement, ka Best Cement kaba la shah khang noh bad katkum ka jingïoh jingtip jong ka seng kane ka company ka dang pyrshang biang mynta ban pynkhie im biang, nangta ka Jaiñtia Cement, ka Tax Cement bad kaba thymmai mynta ka dei ka Shree Cement,” ïathuh u Bah Sohtun da kaba kynthoh ruh ba kine baroh ki karkhana pynmih dew bilat kim ai jingmyntoi eiei ruh em ïa ki nongshong shnong ka Jaiñtia, hynrei ka jingmyntoi ka long tang khyndiat eh, kumta kumno ka sorkar lyngba u Symbud Myntri Rangbah ka jylla u Bah Prestone Tynsong ka ong ba ki ai jingmyntoi shibun ïa ka jylla.