Na ka bhah khajna jongka jylla ai lypa ka Sorkar Pdeng 688 klur tyngka ban pyntrei ïa ki kam pynroi

Shillong, Nailar 2 : Ka Meghalaya ka la ioh pdiang lypa 688 klur tyngka na ka bhah khajna ba la pyllait da ka Sorkar Pdeng ban ïarap ïa ki Jylla ba kin pynsted ïa ki kam pynroi pynpar khamtam ha kaba ïadei bad ki jingtei jingshna hapoh ka jylla.
Ka Ministry of Finance ha ka sngi Saitjain ka la pyllait 1,09,019 klur tyngka sha baroh ki Jylla kum ka jingsiew lypa kaba kham bun ban ïa ka jingai bhah khajna ba man u bnai kaba la dei ban ai ha ka 10 tarik Nailar. Ka Sorkar Pdeng ka ong ba kane ka jingpyllait lypa ïa ka khajna ka thmu ban pynkhlaiñ ïa ka pla tyngka ka Jylla bad pynlah ïa ka Sorkar ba kan pyntrei sted ïa ki jingtei bad pyntreikam ïa ki prokram ba ïadei bad ka bha ka miat.
Napdeng ki Jylla ka thaiñ Shatei Lam Mihngi, ka Assam ka la ïoh bun eh ïa ka bhah kaba kot 3,552 klur tyngka, bud sa ka Arunachal Pradesh-1,476 klur tyngka. Ka Meghalaya ka ïoh 688 klur tyngka kaba duna khyndiat ïa ka Tripura-699 klur tyngka hynrei kham heh ïa ka Manipur 682 klur tyngka, Mizoram-615 klur tyngka, Nagaland 524 klur tyngka bad Sikkim-365 klur tyngka.
Kane ka jingpyllait lypa ïa ka khajna la khmih lynti ba kan plie ka lad ïa ka Meghalaya ba kan pynïaid shakhmat ïa ki project jingtei, ki lad pynïasoh sha ki jaka kyndong, ka pule dangle, ka koit ka khiah bad kiwei ki kam pynroi khlem da ap ïa ka jingsam bhah haduh ka 10 tarik Nailar.