Shillong, Naitung 31 : Ka Jaintia Students Union (JSU) ha ka sngi Thohdieng ka la kynnoh ba ki ‘runar’ ba la wanrah da ka Shree Cement Ltd ki la thombor ïa ka ambulance bad khanglad ïa ki briew ba kin leit ïashim bynta ha ka public hearing jong ka kompani ban tih mawshun ha Lum Syrman.
Ha ka kyrwoh lyngba ka video, u Education Secretary ka JSU u Bochery Mi Pohsnem ula kam ba ka kompani ka la wanrah ïa ki briew ba nabar sha ka thaiñ bad siew dor sngi ïa ki hapdeng 500 bad 1000 tyngka ba kin wan sha ka jingïalang.
“Kine ki briew kila rah da ki jri bad kiwei ki tiar pynmynsaw. Ki la thombor ïa ka ambulance jong ngi bad wat ïa ki medical staff. Kane ka pyni ba kim don satia ïa ka jingïatip lem para briew bad kim lah ban pynïapher hapdengka ambulance bad ka kali shimet” ong u samla Pohsnem.
Ula kynnoh ba kane ka jingthombor ka la jia hapdeng ka por 11:30 mynmiet jong ka sngi Palei, haba ka ambulance ka JSU Central Body ka dang leit shaw ïa ki briew ba mynsaw sha shnong Shnongrim hadien ka jingïoh phone.
Ka JSU kala kam ruh ba kawei ka kynthei na shnong Shnongrim ka la shah shoh bad shah pyn sangeh na ka jingleit pyrshah ïa ka project ha kane ka hearing.
Ka Union ka ong ba ki dkhot, ha ryngkat ki trai shnong na Elaka Nongkhlieh bad ki nongmihkhmat ka KSU, JNC bad kiwei ki Seng, ki la poi sha katei ka jaka ha ka janmiet sngi Palei hynrei la shem ba ki nongïalam jong kiwei pat ki seng, ki la shah bat ha ki Pulit khlem kano kano ka warrant ne shithi hajir.
Ha ka step sngi Thohdieng, u Pohsnem ula kynnoh ba ki dkhot ka KSU ki la shah khang lynti ban rung sha ka jaka ba pynlong ïa ka hearing namar ka jingdon jong ki briew ba don kynhun, kiba khang lynti.
“Kane kam dei ka public hearing. Ka dei ka hearing shimet ba la pynlong hapoh ka jingïada jong ka kynhun. Ngi la ïoh khubor ba ka hearing ka la ïaid beit khlem kano kano ka jingpyrshah, ka bym shym dei satia kaba shisha” ula ong.
Une u nongïalam ka JSU ula pynrem ruh ia u Symbud Myntri Rangbah ba khmih ïa ka kam pohïing namar ka jingkular halor ka jinglong jingman ka suk ka saiñ.
“U ong ba ula bthah ïa u DC bad SP ban pynthikna ba ki briew kin ïoh ïashim bynta. Kaei kaba ngi ïohi mynta ka long da khongpong. Ngi pynrem ïa kane ka jingkular bad dawa ba un hiar shuki” ula bynrap.
Une u nongialam ka JSU u ïathuh ba ka seng kala ïakren bad u DSP ka East Jaintia Hills hadien ka jingthombor bad ka la record ruh ïa ka jingïakren.
“Ngin sa ujor ïa ka ejahar bad u SP ka East Jaintia Hills lashai ka sngi. Lada ym leh eiei, ngin sa leit sha ki bor ba halor bad wat ban tied ïa ka jingkhang ka ïing Bishar High Court” ula ong.
