Balei ka jingpyrshah ka mih hadien 2 snem shiteng ba la sdang ïa ka Ropeway Projek, kylli u Bah Paul

Shillong, Naitung 31: U nongïalam ka UDP bad Myntri sorkar barim ba khmih ïa ka tnat Jngohkai u Bah Paul Lyngdoh u la buh jingkylli ïa ka por jong ka jingpyrshah ïa ka Shillong Ropeway Project, da kaba kylli balei ka jingpyrshah ka la mih hadien arsnem shiteng ba la sdang pyntrei ïa ka Project.
Haba kren sha ki lad pathai khubor u Bah Paul u la ong, “Mynta ba ki briew kin sngewthuh hadien ar snem shiteng ba ka Project ka long kaba sniew, ngam lah pei phang shuh ïa ka jingmut jong kane baroh. Ngam tip satia kaei ka jingmut ba don shadien jong ka jingpyrshah.”
Haba ai jingkyrshan ïa ka projek, u Bah Paul ula ong ba la sdang ïa kane ka Project da ka jingkyrpad jong ki nongshong shnong kiba la ïoh ïa ka jingkyrshan na u nongmihkhmat ba la jied hi da ki paidbah ka thaiñ, u Bah Sanbor Shullai.
U la bynrap da kaba ong, “Ngin ym klet ba kane ka projek ka dei ruh ka jingthmu bad jingkyrpad kaba bad daka jingkyrshan na ka Raid Laban Pyllun, kaba ngi ngeit ba ka dei jong baroh ki Dorbar Shnong jong ka thaiñ.”
Y la ong, “Ïa kane ka projek la kyrshan ruh da u nongmihkhmat ba la jied da ki paidbah jong ka thaiñ, u Bah Sanbor Shullai bad hadien ba la sdang ïa ka Project bun ngut ki mistery bad ki nongshong shnong jong ka Lawsohtun ki la ïoh kam.”
Shuh shuh u Bah Paul u la ong ba kane ka project ropeway la khmih lynti ba kan ai jingmyntoi ïa ki kam jngohkai pyrthei bad ïa ki nongrep jong kane ka thaiñ.
U la ong, “Sngewskhem ba kane ka dei ka projek ka ban ai jingmyntoi ym tang ïa ki nongjngohkai pyrthei. Kam dei tang ban pynsuk ïa ka leit ka wan hynrei wat kito ki nongrep ruh kin lah ban kit ïa ki mar rep jong ki ha ka por kaba 3 minit naduh ki jaka rep shaduh u lum Shillong.”
U Bah Paul u la batai ba kane ka Project Shillong ropeway ka dei kaba nyngkong eh ha ki jaka rilum jong ka ri. U la ong, “Ka rukom ba la shim ka long kaba ïaryngkat bad kaba ngi don ha ki lum ha ka Ri Switzerland, bad lada ka projek kaba heh kat kata ka la don kano kano ka jingktah kaba sniew ïa ki lum, ngin jin da la tip mynta.”
Shuh shuh haba kren pyrshah ïa ki jingshah kynthoh ha ki social media, u la ong, “Kin don beit ki nongkynthoh bad ka jingeh jong kiba bun ki briew ka long ba ki khang shwa ïa ka jingmut jingpyrkhat jong ki ha shuwa ban plie ïa ka shyntur jong ki.”
Halor ka jingkam ba ka Project ka ktah ïa ka jaka sah ki shrieh, u Bah Paul ula ong ba katei ka mat kam don jingïadei bad ka projek Shillong Ropeway.
U la ong ruh da kaba buh ki jingai jingmut, “Nga la peit ïa ki jingkynthoh. Uwei u nongshong shnong u la pynpaw, ‘Nga sah ha kane ka jaka bad kine ki shrieh ki ju wan kai sha ki ïingsah jong ngi mynta la 15 snem,’ kumta kumno phin buh ïa ka jingkynnoh ba kane ka projek ka ktah ïa ka jaka sah jong ki.”
U la ong ba baroh ki jingmynjur katkum ka aiñ la ïoh ha shuwa ban ïaid shakhmat ïa ka Project.
U la bynrap, “Ïa kawei pa kawei ki kot ban pan jingbit la phah sha ka tnat, dei na kata ka daw ngi la ïoh ïa ka muhor jong ka jingmynjur na ka Ministry of Forest and Environment.”
Da kaba kdew ïa ka jingdon bynta jong President ka ri India ha ka ban plie paidbah ïa u maw nongrim, u Bah Paul ong ong, “Kam dei ka kam lehkai ba ka Ministry kaba kum ha ka kyrdan jong ka kan mynjur ïa ka jingtyrwa bad nangta ka la khot ïa ka nongshong shnong ba nyngkong eh jong ka ri. Hato phi tharai ba ka President ka ri India kan nym wad bniah ha shuwa na ka kyrteng jong ka kan shah kynthup ha ka jingshah kynthoh hashuwa ban shah pynlehraiñ ïa ka kyrteng bad ïa ka kum ka President ka ri India?”.