Da ki cold storage bad karkhana shna marbam phaikhmat ka jylla ban tehlakam jinghiar dor ki mar rep

Shillong, Naitung 30 : Ka sorkar Jylla ka buh thong ban pynkhlaiñ bad pynbun ïa ka jingtei ïa ki jaka buh mar rep ban ym pyut lane ki cold storage bad kumjuh ïa ki karkhana shna jingbam na ki mar rep lane ki processing unit ha kylleng ka jylla ban ïarap ïa ki nongrep ban lait na ka jingktah jong ka jingkiew bad jinghiar ka dor ki mar rep ha ïew.
Ïa kane la pyntip da u Myntri ka tnat Rep ka Riang ka sorkar jylla, u Timothy D. Shira, haba kren bad ki lad pathai khubor ha ka sngi Palei.
U Myntri u la ong ba ka jingdon ïa ki cold storage kan ailad ïa ki nongrep ban buh ïa la ki mar rep haba ka dor ka hiar bad ban die pat ynda ka dor ka kiew, kaba long ka lad ban pynduna ïa ka jingduhnong.
“Lada ka dor ki jhur ka hiar, ki nongrep ki lah ban buh ïa ki mar ha cold storage. Ynda ka dor ka kiew biang, kin lah ban sei bad die ïa ki mar jong ki. Kane ka dei kawei na ki lad jingïarap ba ka sorkar ka dang pyrkhat,” la ong u Shira.
U Myntri u la ong ba ka sorkar ka dang pyrshang ruh ban pynbun ïa ki processing unit khnang ban pynduna ïa ka jingïashaniah ha ki nongkhaïi (middle men) bad ban pynthikna ba ki nongrep kin ïoh ïa ka dor kaba kham bha.
“Lada don ki processing unit, ki middlemen kin ym lah shuh ban buh ïa ka dor. Ki cooperative society kiba pynïaid ïa kine ki unit kin buh ïa ka dor kaba kham myntoi ïa ki nongrep, bad ki nongrep kin lah ban die beit ïa la ki mar sha ki processing unit,” u la ong.
U la kdew ïa u shynrai Lakadong kum ka nuksa, da kaba ong ba hadien ba la seng ïa ki spice processing unit ha Bhoirymbong bad ha Ri Jaiñtia, ka dor u shynrai ka la kiew.
“Hadien ba la plie ïa ki spice processing unit ha Bhoirymbong bad ha Ri Jaiñtia, ka dor u shynrai ka la kiew. Kane ka pyni ba ki processing unit ki ai jingmyntoi shisha ïa ki nongrep,” u la ong.
Haba kylli halor ka jingdawa ban buh da ka Support Price na ka bynta baroh ki mar rep, u Shira u la ong ba kam long kaba lah namar kan pynlut bun eh ïa ka sorkar.
“Kam long kaba suk ban ai Support Price ïa baroh ki mar rep namar kan long ka jinglut kaba khraw ïa ka sorkar. Kumta ngin wad da kiwei pat ki lad jingïarap kiba lah ban ai jingmyntoi ïa ki nongrep,” u la bynrap.
U Myntri u la pyntip ruh ba ka tnat kan bishar ïa ka jingdonkam jong man la ka district ban pynheh shuh shuh ïa ki cold storage bad processing unit, khnang ban pynduna ïa ka jingjulor ki mar rep bala dep lum bad ban pynkiew ïa ka jingïoh nong jong ki nongrep.