Shillong, Naitung 30 : U Chief Electoral Officer ka jylla u Dr BDR Tiwari u la pyntip ba la lah ban pyndep 100 % ka jingrung ïing bad sam ïa ki kot pynrung kyrteng sha ka Electoral Roll lyngba ka Special Intensive Revision 2026 bad kane ka la long ka jingjop jongka jylla ha ka jingpynkhreh ban pynlong ïa ka election kaba khuid bad suba lyngba ka jingpynrung kyrteng ïa kiba dei hok ban ïoh thep vote.
Ka jingleh ïa ka Special Intensive Revision (SIR), 2026 ha ka jylla Meghalaya kala kut noh hynne ka sngi Palei, ha kaba kala kot sha ka 100% jong ka jingpynrung kyrteng ki nongthep vote kiba don baroh 23,49,645 kiba la aiti ïa ki phom ki jongki sha ka tnad Election jong ka jylla.
Ka Office jongu Chief Electoral Officer, Meghalaya, kala pynbna ba la pyndep ïa ka jingleit rung ha man la ki ïing ki sem ha kylleng ki bynta jong ka jylla Meghalaya ban pyndep ïa ka Special Intensive Revision (SIR), 2026, da ka jingthmu ban shim ïa ka sienjam ban pynkhreh ïa ka jingkhuid, jingbeit ryntih bad ka Electoral Roll kaba salonsar ha ka jylla.
“Haduh ka 30 tarik u Naitung, 100% jong ki nongthep vote ha ka jylla kaba kynthup ïa ki 23,49,645 ngut ka dei kaba lah dep ban kynthup ïa kitei ki 23,49,645 ngut, ha kaba la sam ïa ki Enumeration Form bad la pynrung kyrteng ruh lyngba ka kor Digital, kaba pyni ïa ka jingtrei shitom bad ka jingdon ïa ka jingïatreilang bad ki bor pynïaid elekshon ha ka jylla.
Ki la don baroh 23,49,645 ngut ki nongthep vote ha ka jylla, ïa ki phom kiba la sam bad la pynrung da ka Digital ki long 23,49,645 ngut (100%), ha kaba ki don 7,75,337 ki nongthep vote (33.00%) kiba lah dep ban pynrung dalade bad la dep ban pynïasoh da kaba seisoh ïa ka electoral record ka jongki bad ka Special Intensive Revision (SIR) 2005 database.
Ki la don 11,69,670 ngut ki nongthep vote (49.78%) kiba la shah pynrung kum ki Progeny bad ïa ki rekod ki jongki lah dep ban pynïasoh bad ka electoral record jong ki kmie ki kpa, ne ki kmie ieid kpaieid kiba la don ha Special Intensive Revision (SIR), 2005 database.
Ki la don baroh 2,24,234 ngut ki nongthep vote (9.54%) ki bym shym la lah ban pynïasoh bad ki Record jongka Special Intensive Revision (SIR), 2005 bad la pynhap noh ïa ki ha ka kyrdan “No Mapping”. ïa kum kine yn dang hap ban pynshisha ha ka Notice Phase, kynthup ïa ka por ban pyndep ïa ka Claims and Objections, ka ban long ha ka 5 tarik u Nailar haduh ka 3 tarik u Risaw 2026, ka ban ïaid katkum ki kyndon jong ka Registration of Electors Rules, 1960 bad ki jingbthah jongka Election Commission of India. Ha katei ka por ki nongthep vote kin ïoh iïa ka lad ban ai ïa ki jingtip bad ïa ki kot ki sla kiba kongsan, ha ka por kaba donkam, hashwa ban shim ïa kano kano ka rai ha kaba ïadei bad ka jinglong jingman ka jongki kum ki nongthep vote.
Kum shi bynta jong katei ka jingpynshisha, 1,80,404 ngut ki nongthep vote (7.68%) ki dei kiba lah dep ban ithuh kum ki Absent, Shifted, Deceased bad Duplicate (ASDD). Kiba la khlad noh ki don 81,490 ngut (3.47%), ki bym shim la pynphai ïa ki EF ki don 45,013 ngut (1.92%), kiba la kynriah jaka pura ki don 42,532 (1.81%), kiba la kyntait ïa ki EF ki don 4,668 ngut (0.20%) bad kiba lah dep ban Enrolled (Duplicate) ki don 6,701 ngut (0.29%).
U Chief Electoral Officer ka Meghalaya, ula ai khublei ïa baroh ki seng saiñ pyrthei ïa ka jingai ïa ka jingïatreilang ha ka jingleh ïa ka Special Intensive Revision. Ka jingai jingkyrshan kaba pura jongki Booth Level Agent (BLA) kiba la thung da ki seng saiñ pyrthei kaba la noh synniang shi kat dei ïa ka jinglong khuid long suba, ka jingïashim bynta jong ki paitbah bad ka jingseisoh ha ka ban pyntreikam pura ïa kane ka SIR.
U CEO ula ai khublei ruh ïa ka tnad Election baroh kawei, kaba kynthup naduh ki District Election Officer (DEO), Electoral Registration Officer (ERO), Assistant Electoral Registration Officer (AERO), Booth Level Officer (BLO), BLO Supervisor, Election Technical Team, District SIR Team, Data Entry Operator bad baroh ki ophisar bad ki nongtrei kiba don bynta bad ka jingleh ïa ka Special Intensive Revision.
Ula ai khublei ruh ïa ka jingai jingkyrshan jong ki Dorbar Shnong, Nokma, nongïalam shnong, ki kynhun bad ki seng jong ka imlang sahlang, ki seng saiñ pyrthei, ki lad pathai khubor bad ïa baroh ki nongshong shnong ka Meghalaya, ha kaba ka jingïashim bynta ka jongki bad ka jingai ka jingïatreilang ka la pynlong ïa ka jingleit rung ha ki ïing ki sem jong ka Special Intensive Revision kaba jop.
Ka Tnad Election mynta kan pynleit jingmut ha kaban pynshisha ïa ki nongthep vote kiba la pynhap ha ka kyrdan No Mapping bad ASDD bad ban pyndep ïa baroh ki jingdonkam ka ban lam sha ka jingpynmih ïa ka Draft Electoral Roll ha ka 5 tarik u Nailar 2026 kumba la pynbna da ka Election Commission of India.
