Nongpoh, Naitung 29: Kum shi bynta ban kyntiew ïa ka jingnang jingstad khamtam haba ïadei bad ka juk computer bad ruh ban pynjan ïa ka jingïadei hapdeng ki bor pahara bad ki paidbah, ka 67 Battalion jong ka Central Reserve Police Force (CRPF), Shillong ka la sdang ïa ka prokram ai jinghikai computer ei hapoh ka Civic Action Programme ha ka jingïatreilang bad ka Regional Institute of Advanced Studies (RIAS), Nongpoh, Ri-Bhoi District.
La plie paidbah ïa kane ka prokram ha ka 27 tarik Naitung 2026 da u Commandant Sh Jai Singh jong ka 67 Bn CRPF, Polo Ground, Shillong. Ïa kane ka sienjam la shim ban ai jingmyntoi ïa ki samla kiba wan na ki longïing kiba duna ka ioh ka kot, khnang ba kin ïoh ïa ka jingnang jingstad ha ka computer bad ha kajuh ka por ban pynkhlaiñ ïa ka jingïadei kaba jan bad ki paidbah jong ka thaiñ Nongpoh, ha kaba ka kynhun jong ka E Company jong ka 67 Bn CRPF ki don ban pahara bad ban wanrah ka shongsuk shongsaiñ ha ka thaiñ Nongpoh.
Ha kane ka prokram, 14 ngut ki samla ki la shah jied ban ïashim bynta bad kin ïoh jinghikai ei ha ki bynta jong ka Fundamentals of Computer bad Microsoft Office naduh ka 27 tarik Naitung haduh ka 30 tarik Nailar 2026. Kane ka jinghikai kan ïarap ïa ki ban kyntiew ïa ka jingnang jingtip ha kaba ïadei bad ka kor computer bad ban pynkhreh na ka bynta ki lad ïohkam.
Haba kren ha ka jingïalang plie paidbah, u Commandant Jai Singh u la ban jur ïa ka jingdonkam jong ka computer ha kane ka juk ba mynta bad u la kyntu ïa ki samla ba kin pyndonkam hok ïa kane ka kabu. U la ong ruh ba ka CRPF kan bteng ban ai jingïarap sha ki paidbah lyngba ki prokram kiba wanrah jingmyntoi ïa ka imlang sahlang.
Ha kane ka jingïalang la sakhi lang da u Inspector (GD) Ajit Kumar, Officer Commanding jong ka E/67 Bn CRPF, u Skhemborlang Swett, Managing Director jong ka Regional Institute of Advanced Studies (RIAS), ryngkat bad ki nonghikai, ki ophisar ryngkat ki samla pule.
