Nongstoiñ, Naitung 29: U heprit Donald Myrthong 12 snem ka karta u dei u khun ba hynriew jong u babu Franko Puweiñ bad ka kong Daplin Myrthong kiba shong bas ah ha ka shnong Risiang West Khasi hills district kaba jngai kumba khawei kilomitar na Nongstoiñ kaba don harud ka surok Nongstoiñ – Maweit.
Kaba sngew tynnad ka long ba utei u herit naduh dang rit u don ïa ka sap ïalehkai phutbol kaba phylla bha bad hadien ba u kpa u la iohi ïa ka sap bad ka jingtbit u la phah pyntbit ha kawei na ki jaka aijinghikai ha Nongstoiñ.
Ha ka por ba u don ha ka jingpyntbit ha Nongstoiñ ki nonghikai ki la ïohi ba utei u hep rit u don shisha ïa ka sap kaba kyrpang kumta ki la btin lynti ïa u haduh ba un da ïoh ban rung ha kawei ka shlem ai jingikai phutbol jong ka ri India kaba la tip kum ka Minerva Football Academy kaba don ha ka jylla Punjab.
Utei u heprit u la ïoh ban rung ha katei ka Academy naduh u snem 2024 bad u la bteng ruh ban leit skul bad mynta u dang pule ha ka Class VI.
Kaba sngewtynnad ka long ba ka jing tbit jongutei u heprit ha ka jingïalehkai phutbol ka la pynlong ba un shah jied kum u kapten jong ka Minerva Football Academy ban leit ïashim bynta ha ki artylli ki lynpung ïalehkai phutbol jong ki khynnah kiba hapoh khatar snem kiba la long shabar ka ri India kata ha ka Helsinki Cup 2026 kaba la oong ha Finland ha ka 11 tarik mynta u bnai.
Ha katei ka lynpung ïalehkai ka Minerva Academy ka la ïakhun pyrshah ïa ka kynhun ïalehkai kaba la tip kum ka HJK bad ka la lah ban pynliem das hi kol la nod.
Hadien jongkatei ka lympung ka Minerva Football Academy ka la ïoh lad ban leit ïashim bynta sa ha kawei pat ka lynpung ïalehkai kaba la tip kum ka Gothia Cup 2026 kaba la long ha Sweden ha ka 19 tarik mynta u bnai ha kaba ka Minerva Football Academy ka la ïoh ban ïakhun pyrshah ïa ka Brazil RS Yellow ha kaba ka Minerva Academy ka la pynliem ïa ka Brazil RS Yellow da ar kol la nod.
Hadien ba la wan phai na kitei ki artylli ki lympung ïalehkai u heprit Donald Myrthong u la ïoh shuti bad u la wan sha la shnong ha kaba ka ka dorbar shnong Risiang kum ka dak jong ka jingsngew burom ïa utei u heprit ka la pynlong ïa ka jingpynup burom kaba kyrpang ha kane ka sngi balang ka 29 tarik Naitung.
ïa kane ka jingïalang pynkup burom la pynlong ha Lurmangkara Upper Primary skul ha kaba la pdiang burom ïa utei u heprit da ki khynnah skul, ki nonghikai bad ki paitbah shnong.
Ha ka jingïalang kaba la pynïaid da ubah Pynshailang Kharbani secretary jong ka shnong la ïadon lang da ki kmie ki kpa, u sordar shnong, ki nongkitkam kiba la wan ban mihkhmat ïa ka kur Myrthong Khasi Jaiñtia ,ki sengbhalang ba kynthup ïa ki nongïalam ka FKJGP Maweit circle, HYC Maweit circle ki Coach kiba la btin lynti ïa u heprit haduh ba un da poi ha katei ka kyrdan.
