Jowai, Naitung 24: Ka jingïalehkai phutbol ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) kaba la long ha ka sngi saitjaiñ ha madan Kiang Nangbah Stadium Jowai.
Haba phai sha ka jingïakhun hapdeng ka West Madan Mustem pyrshah ïa ka Lion Sports & Youth Affairs ka jingïalehkai kala long kaba ïakhaid bha hapdeng ki ar kynhun, hynrei ka Lion Sports & Youth Affairs kala ïoh ban thep ïa ka kol ba nyngkong ha ka minit kaba 6 da u Arkini Laloo.
Na ka liang ka kynhun ïalehkai jong ka West Madan Mustem kala la ïakhun ban pynphai ïa katei ka shikol bad dei ha ka minit kaba 42 kala ïoh thep ïa ka kol lyngba u Nineciful Shylla, hadien nangta kala ïoh biang ban thep sa ka kol ba ar da u Beloved Talang ha ka minit kaba 59.
Haduh ba kut jong ka jingïakhun ka West Madan Mustem ka la jop da 2-1 kol ïa ka Lion Sports & Youth Affairs.
