Mawkyrwat, ‘Naitung, 24: Ka Mawten Sports Club ha ka sngi Saitjaiñ ka la long ka lahduh hadien ba ka la lah ba pynliem noh ïa ka Rangjadong Sports Club da 2 – 0 kol ha ka jingïalehkai jong ka Super Division ba la pynïaid da ka Mawkyrwat District Sports Association (MDSA) lyngba ka Referees Committee hapoh Madan Artificial Turf, MDSA, Mawkyrwat.
Haba phai ha ka jingïalehkai naduh ba sdang ka jingïalehkai ka ka long ka jingïaleh kaba itynnad bha namar ka jingïakhun ka long ban ïoh ban ïa thep bun kol bad pynbun ïa ka jingkheiñ point. Ha ka jingïalehkai jong ka kyllastep ka jingïakhun ka la long kaba ïa khaid bha namar ka jingïapyrshang ban ïa thep kol ruh ka long mar ïa katjuh bad haduh kaba kut jong kane ka lympung ruh ym shym la don mano mano ba ïoh ban ïa pynkhih jar wat kawei ruh.
Ha ka jingïalehkai jong ka kyllamiet pat ka jingïaleh ka la sdang ban kham itynnad shuh shuh namar ka Rangjadon SC ruh ka la sdang ban ñion tyngeh pyrshah ïa ka Mawten SC hynrei da ka jinglah ban kyrda ki ‘rang ïalehkai ba hadien jong ka Mawten SC ka Rangjadong SC kam shym la lah ban pynurlong ïa ka jingthmu. Katba ki minit ki la nang ïaid shakhmat ka Mawten SC ka la sdang ban pyni bor katlah kat ïai bad da ka jingtrei shitom ki la lah ban pynurlong ban pynrung ïa ka bol hapoh ka kol kata ha ka minit kaba 78 na u Terrence Jyrwa, bad ha ka minit kaba 85 na u Lastborn Syiemïong bad lyngba kine ki ar tylli ki kol ka Mawten SC ka la rah syndon ïa ka nam lahduh da kaba la ka tam noh da 2 – 0 kol.
U kongsan uba la wan ban pynhap pyrda ïa kane ka jingïalehkai jong ka Super Division ba la pynïaid da ka Mawkyrwat District Sports Association (MDSA) u dei u bah Renikton Lyngdoh Tongkhar u nongmihkhmat jong ka Mawkyrwat Constituency bad Myntri ka tnad umbam umdih jong ka Sorkar Jylla Meghalaya.
U bah Renikton ha ka jingkren jong u kum u kongsan u la pynpaw ka jingaikhublei na ka bynta ki ar tylli ki kynhun ka Rangjadong SC bad ka Mawten SC kiba la poi sha kane ka wat kaba khadduh ha kaba ma ki ki la pyni shisha ïa kata ka sap ka phong ba ki ki don naduh ka jingpashad bol, ka jingïapyrshang thep kol bad kiwei kiwei de ki bynta jong ka jingïalehkai. Shuh shuh ha ka jingkren jong u u la ai mynsiem na ka bynta ki ‘rangïalehkai ba haba ki ïalehkai kim don ka jingduna ei ei shuh ban ïa nujor bad kiwei de ki ‘rangïalehkai ha kiwei de ki jaka. Namarkata, u don ka jingkyrmen ba kum ki samla kin nang kiew na kawei ka por sha kawei pat ha kane ka bynta.
Ban kyntiew shuh shuh ïa ka kam ïalehkai ha ka dong ka thaiñ bad ka distrik hi baroh kawei, u bah Renikton u la ong ba un sa ïakren bad u bah Pius Marweiñ u nongmihkhmat jong ka Ranikor Constituency ba kin sa ïoh ban pynlong ïa kawei ka lympung ïalehkai kynjatbol tang na ka bynta ki samla jong ka South West Khasi Hills District bad ym shah ban wanrah da kiwei pat khnang ba yn lah ban ithuh bad kyntiew shisha ïa ki samla kiba don ka sap ha ki jingïalehkai.
Haba kren pynkut u la ai khublei kyrpang ïa baroh ki kynhun kiba la ïashimbynta bad kiba don ha ka Super Division bad kumjuh ruh ïa ka Mawten Sports Club kaba la long ka lah duh ha une u snem 2022 bad kaba la ïoh bun eh ki point.
Ha kaba kut jong ka jingïalehkai na ka liang ka MDSA lyngba u bah Renikton Lyngdoh Tongkhar u nongmihkhmat jong ka Mawkyrwat Constituency bad Myntri ka tnad umbam umdih jong ka Sorkar Jylla Meghalaya ka la ïoh ban sam ïa ka khunsam nongjop ryngkat ka song pisa kaba T. 50/- hajar tyngka sha ka Mawten Sports Club bad kane ka kynhun kan sa ïoh ban mih khmat ïa ka South West Khasi Hills District ha ka Meghalaya State League ka ban sa long shen ha kine ki khyndiat sngi.
