Ki Dorbar Kur kin duhjait, kin ïeng ki Dorbar Kha lada ai jait ha u Kpa: Kong Badariti L. Nonglait

Nongstoiñ, Naitung 24: Ka jingdawa jong ka Synkhong Rympei Thymmai (SRT) na u Lat ka jylla, ba um dei ban soi ne mynjur ïa ka aiñ ba ka Khasi Hills Autonomous District Council ka la leit ban phah pynskhem halor ka jingai jait jong ka Jaitbynriew Khasi Pnar ha ka kmie, ka long kaei kaei ka bym lah ban pdiang, namar ka dei ka byrsieh bad kan pynduh pyndam shisyndon ïa ki dorbar kur, kiba la seng nongrim da ki longshuwa man shuwa naduh hyndai hynthai, lyngba ka Ïawbei bad u Thawlang, ong ka kong Badariti Lyngdoh Nonglait President ka HSPDP central body Women Wing.
Ha u kyrwoh ba la phah mynta ka sngi, ka nongïalam jong ka HSPDP jong ka Women wing ka la ong ruh ba ki riti ki dustur jong ka jaitbynriew, ki dei kiba don ha ki mat treikam jong ka party bad dei halor kitei ki mat, ba baroh ki longkmie jong ka party ki ïeng skem ban pyrshah ïa ka jingleit dawa jong ka SRT hakhmat u Lat ka jylla.
Na ka liang ki longkmie ki pynrem jur ïa ka SRT halor ka jingthmu jong ka ban pynkylla khongpong ïa ka rukom ai jait sha ka kmie kaba la pynkyntang bad la suit la shor naduh hyndai kulong. Ka la ong ba ka tip kur tip kha, tip briew tip blei, tip hok tip sot ki dei ki nongrim kiba la hikai ïa ka jaitbynriew naduh mynbarim.
Ka kong Bada ka la ong ruh kaba sngew shyrkhei ba lada ka jaitbynriew kan pynkylla khongpong ïa ka kheiñ jait na ka kmie sha u kpa, kan kylla long ka sang ka byrsieh ka ban ktah ïa ka burom ka ijot jong ka jaitbynriew baroh kawei. Ka la ong ruh ba haba im ka riti ka dustur ka im ka jaitbynriew, hynrei lada ïa ka jingai jait la pynkylla dei hangta ba ka jaitbynriew kan ïap duh syndon.
Ka la ong ruh ba ka jingai jait sha ka kmie da ki long shuwa naduh hyndai kulong kumah, ka la dei lypa ka jingpynkup bor kaba pura ïa ki kynthei bad haba phai ha kane ka juk kaba mynta, wat kiwei pat ki jaitbynriew ha shi tyllup ka pyrthei kiba ai jait ha u kpa ki la ïaid shakhmat bad ïaksaid da kaba tyngeh ban pynkup bor pura ïa ki kynthei ha baroh ki liang.
Ka la kyntu ïa ki paitbah bad ka jaitbynriew Khasi Pnar, ba kim dei ban shah ïalam bakla ne shah pyngop ha ki nongïalam ka Syngkhong Rympei Thymmai ban ai jait noh sha u kpa, namar lada bakla kan kylla long ka jingtim kaba shyrkhei ïa ka pateng ban wan.