Shillong, Naitung 17: Ka tnad Obstetrics bad Gynaecology, NEIGRIHMS ha ka jingïatreilang bad ka Shillong Obstetrics bad Gynaecological Society (SOGS), kala pynlong ïa ka prokram AOGIN-India Interim CME ha NEIGRIHMS, Shillong ha ka 11 tarik, Naitung 2026.
Ka AOGIN (Asia-Oceania research organisation on genital infections & Neoplasia) ka dei ka rynsan ba la paw kaba batai shai shaphang ka jingpang bampong jong ki kynthei ha ka kynhun shongkha lane ba tip ha ka ktien nongwei, ka Gynaecological Cancers.
Ha katei ka prokram, la don haduh 120 ngut ki nongïashim bynta kynthup ïa ki doktor ba sumar iaki kynthei, kiba la pyndep ïa ka jingpule ba la heh kyrdan, doktor na ki distrik bapher bapher jong ka jylla Meghalaya lem bad ki nongmihkhmat na kiwei pat ki jylla ka thaiñ shatei lam mihngi kiba la ioh jingmyntoi na kane ka prorkam bad ai jingïarap hangne.
Ka CME ka la pynleit jingmut halor ka jingïada na ki jingpang bampong ba ïoh ki kynthei lem bad ka jingban jur ba kyrpang halor kane ka jingpang. Ha katei ka prokram, la ïakren shaphang ka jingpang bampong kaba lah ban lap kloi bad ban sumar noh mar mar. Ka prorkam halor ki rukom sumar bad ki rukom test kiba bunjait kala ioh iaka jingwan shim bynta kaba shyrkhei kaba bha tam.
Ka nong ïoh ïa ka khusnam Padma Shri bad nongkren ha kane ka prokram, ka Dr. Neerja Bhatla, kala pynshai shaphang ka jingïada bad pynduh jait ïa ka jingpang bampong ha ka ryndang ka pla khun lane cervical cancer.
Ka CME ka la pynleit jingmut halor ka jingpang bampong ba ïadei bad ka jingpang bampong HPV, ka jingai tika na ka bynta ka jingpang bampong HPV bad ka jinglap shen ïa ki tika.
U kongsan ha kane ka prokram, u Prof. (Dr.) Nalin Mehta, uba dei u Director ka NEIGRIHMS u la ïaroh ïa katei ka prokram ba shisien shi snem bad thab kti ïa ka jingtrei shitom ka tnad ha kaban pynlong ïa kane ka prokram kaba ïarap ban pynïapher hapdeng ka jingtest ïa ka jingpang bampong bad ka jingkloi ban sumar ïa ka.
