Sam kubi ei ki nongrep ha phyllaw State Central namar la shaba palat ka dor

Shillong, Naitung 16 : Ka jingshah khñiot palat ka dor jong u kubi ka la pynlong ïa ki nongrep ban shu leit sam ei syndon sha ki paidbah nongleit nongwan ha kane ka janmiet sngi Palei ha phyllaw jong ka State Central Library Shillong.
Haba kren sha ki lad pathai khubor, u nongïalam jong ka Hills Farmer Union, Bah Alfond Kharsyntiew u la ïathuh ba ka dei ka jingibein kaba haduh katta katta ba ka dor jong u kubi kan hiar haduh 2tyngka bad teng teng haduh shi tyngka shi kilo.
U la ong ruh ba da ka jingkthang ka mynsiem ki nongrep bapli kim kwah shuh ban leit die sha iew namar tang ka bai kali, bai kit bai bah ym lait shuh. Kata ruh khlem da khein ïa ka bai trei, bai sboh bad kumjuh ka bai dawai. Shuh shuh u la ong ba dei na kane ka daw ba ki la shu rai kut ban shu wan ai sngewbha noh sha ki paidbah nongleit nongwan ban ïa kaba leit die duh nong ha iew.
“Ban die tang 2tyngka shi kilo ka la dei ka jingñion bein shaba palat pud. Kumta ha ka jingkynduh bad ki nongrep ki la pynpaw ba kim kwah shuh ban ot ïa u kubi na lyngkha namar kin ngat naduh ka bai kali, bai daju bad ka bai bylla ruh kin hap ban siew. Kumta ki ong ba ka la bha ban shu ieh beit ha lyngkha,” ong u Bah Alfond.
U la ïathuh ba uwei u nongrep u la ai jingkhein ba ha ka 100 nur ki lah ban ïoh ot haduh 6 ton u kubi lane kumba 6000 kilo ei ei. “Na ka bynta 6000 kilo katkum ka jingkhein jong u, ka jingpynlut kan kot sha ka 60,000 tyngka na ka bynta 100 nur. Kumta lada 60 hajar dei ka jingpynlut kumta lada die pat tang 2 tyngka shi kilo ka jingmih kan long tang 12,000 tyngka bad ka jingduhnong kan long haduh 48,000 tyngka na ka bynta 100 nur.”
La ïathuh ba kane ka jingeh ka la neh la ar bnai bad kumta ki nongrep ruh ki la poi ha ka kutlad namar na ka bank ki la phah wan siew noh ïa ka ram rep. “Kumta na ki nongrep ki la ong ïangi ba lada don kali ban wan kit ei ïa ki mar rep ban ïa kaba pyut ei ha lum. Kane kadei ka khubor kaba shai na ki nongrep.”
Shuh shuh u ong ba kum ki nongrep kiba la ri la sumar da ka jingieid ïa u kubi kumta ki pangmet ban ïohi ba yn shu bret ei kumto. Na kata ka daw ki kwah ban shu ai ei noh sha ki paidbah kiba ïoh pdiang da ka jingieid.
“Ki nongrep ki la ong ruh ba lad die mangi poi 2tyngka hynrei da leit thied mangi pat mangi na kiwei poi 30tyngka shi kilo. Kumta ki la ong ba kim lah sngewthuh ïa kane ka rukom pynïaid ïa ka dor ka mur.”
U Bah Alfond u la ong ba ba kane ka dei ka dak ba na ka liang ka seng ki nongrep ki kwah ban pynpaw sha ka pyrthei ïa kaei kaba ki nongrep jhur ki mad bad shem ha ka jylla.