Shillong, Naitung 16: U Conrad K Sangma uba dei u Myntri Rangbah ka Jylla ha ka sngi Palei, ula pynbna ba ka Sorkar Meghalaya kan sa wanrah da ka Resolution hapoh ka Ïingdorbar Thaw Ain ka Jylla, ban pyrshah ïa ka jingtih Uranium hapoh ka Jylla.
Ha ka kyrwoh bala ai lyngba ka durkhih, u Conrad ula ong ba ka Sorkar ba ïalam da ka National Peoples’ Party (NPP) ka ïeng skhem ha ka nongrim ban pyrshah ïa kano kano ka jingthmu ban tih ïa u Uranium ha Meghalaya.
“Nga la dep kren shai la bun sien ba ka sorkar jong ngi ka pyrshah ïa ka jingtih uranium bad ngin pyrshah ïa kano kano ka jingpyrshang ban ioh tih ïa u uranium hapoh ka Jylla” ong u Myntri Rangbah.
Ula pyntip ba ula dep shong jingialang kaba bniah bad bun ki nongialam ka NPP ha ka sngi Balang.Ha ka jingiakren, ki nongialam da kawei ka sur, kila ai jingmut ba ka Sorkar Jylla bad ka Assembly ki dei ban mynjur da ka Resolution ban pyrshha ïa ka jingtih uranium.
“Halor kane ka jingai jingmut bad ka rai bala shim da ki nongialam ka NPP ha ka jingialang hynnin ka sngi, ngi la jam shakhmat bad ngi la pynkhreh ban mynjur da ka Resolution ban pyrshah ïa ka jingtih uranium ha Jylla” ong u Conrad.
Shuh shuh u Myntri Rangbah ula pynpaw ïa ki jingsngewkhia halor ka jingktah ïa ka mariang bad ïa ka imlang sahlang ha lyndet kane ka rai.
“Ngi iatip bha ïa ki jingktah ba bun jait kiba lah ban wanhap ha ki briew jong ngi, ha ka mariang, ha ki khlaw bad ka lawei jong ka Jylla.Ki don shibun ki jingma kiba ap hangne.Kumta, ngi la ïeng skhem ba ngin pyrshah ïa ka jingtih uranium ha ka Jylla jong ngi” ula bynrap.
Haba kdew ïa ka jingwan ba dang shen jong u Myntri Khynnah Dr Jitendra Singh sha Shillong, u Conrad ula ong ba u Myntri ula pynshai sha ki lad pathai khubor ba ka Sorkar India kam pat shim satia ïa kano kano ka rai halor ka jingtih uranium ha Meghalaya bad kane ka kam ka dang don hapdeng ka jingbishar.
“Ka jingkren jong u kala shai bha ba ka Sorkar India kam pat rai eiei halor kane ka kam” ong u Conrad.
