Thrang u CM ban sted ka jingpynrung kyrteng Aadhaar bad e-KYC ban ym duh ei ïa ki skhim sorkar pdeng

Shillong, Naitung 16 : Ka Sorkar Jylla ka thrang ban pynkhlaiñ ïa ka jingpynrung kyrteng Aadhaar bad ka e-KYC ha kylleng ka Jylla ban pynthikna ba ki nongïoh bynta kiba dei hok, kin ïoh ïa ki jingmyntoi na ki skhim bapher bapher jongka sorkar pdeng bad sorkar jylla, ong u Myntri Rangbah Conrad K Sangma ha ka sngi Palei.
Haba shong bishar ïa ki kam halor ka jingïaid ki kam pynrung kyrteng Aadhaar bad jingpynïasoh bad ka Tnad Community & Rural Development, ka Tnad ka Koit ka Khiah, Social Welfare bad Food & Civil Supply, u Conrad ula ong ba ka Sorkar Jylla ka la pynleit jingmut ban pyndap ïa ki jingduna ha ki jingpynïasoh Aadhaar bad jingpynshisha ïa ki nongïoh jingmyntoi.
Ha kane ka jingïalang, la pyntip ba 77.02% ki longïing ki dei kiba la shah kynthup hapoh ka Meghalaya Health Insurance Scheme- Pradhan Mantri Jan Arogya Yojana (MHIS-PMJAY) kiba la pynïasoh bad u Aadhaar katba 57.13% ki dei ki nongïoh jingmyntoi shimet kiba la dep pynïasoh.
Hapoh ka National Food Security Act (NFSA), ka Jylla ka la pyndep haduh 61.01% ka e-KYC, ha kaba ka Sorkar mynta ka la pyrkhat ban pyndonkam ïa ki Common Service Centre (CSC) ba kin pynsted ïa ka jingpynshisha ïa kiba dang sah bad ban pynrung kyrteng Aadhaar ïa ki briew ki bym pat dep ha kylleng ka Jylla.
U Conrad ula ong ba ka Sorkar kala rai ban pynlong biang sa kawei ka prokram ban pynrung kyrteng Aadhaar bad ka jing pynsngewthuh paidbah ha ryngkat ka jingïatreilang bad ki bor District lem bad ki Tnad ba dei khmih ban lah pynbun ïa ka jingpynrung kyrteng, khamtam ha ki jaka kiba duna ki nongpynrung kyrteng.
Haba kular ïa baroh ki jingkyrshan na ka Sorkar ban ïarap ïa ki nongshong shnong ba kin pyndep ïa ka jingpynrung kyrteng Aadhaar bad e-KYC, u Myntri Rangbah ula ban jur ba ki nongïoh jingmyntoi jong ki skhim ka Sorkar Pdeng kin hap ban don ïa u Aadhaar bad e-KYC khnang ba kin pynthikna ba kan ym don ka jingthut ha ka jingwan ki jingmyntoi.
Kane ka jingïalang bishar kam ka dei shibynta jong ka jingpyrshang ka Jylla ban pynkhlaiñ ïa ka jingai ïa ki skhim ba ïadei bad ka bha ka miat khnang ba yn lah pynithuh thikna ïa ki nongïoh bynta kiba dei hok bad pynïasoh sha ka database ka Sorkar.