Ther kylla ka JNC bad JSU ïa u CEM ka JHADC tang haduh 20 Naitung ai por halor ka projek Shree Cement

Shillong, Naitung 16: Ka Jaintia National Council (JNC) bad Jaintia Students’ Union (JSU) ha ka sngi Balang, ka la kynnoh ba u Chief Executive Member (CEM) jongka Jaintia Hills Autonomous District Council (JHADC) u Ma Thombor Shiwat ula leh kiar ïa ka jingsngewkhia bad sngewthuh bakla ïa ka jingïakhih ka jong ki pyrshah ïa ka projek Shree Cement.
Hadien jongka jingïalang kaba kyrkieh, u President ka JNC u Ma Sambormi Lyngdoh ula ong, ba ka jingkren u CEM ban buh jingkylli ïa ka jingpynlong ïa ka Rally ka long kaei kaei kaba ym donkam.
“Ngi lah pan jingbit na ka ophis jong u Deputy Commissioner. Ngim shym la ïoh jubab. Ha ka riti synshar paitbah, ngi don ïa la ka hok ban ïakhih da kaba jai jai” ong u Ma Lyngdoh.
Ula bynrap ba ka jingkam u CEM ba ym don jingtip eiei ïa ka jingïakhih ka long kaba lyngngoh, namar ba ka jingïakhih ka dei kaba lah pynlong naduh mynshem snem bad katei ka mat ka dei kaba lah pathai ha kylleng.
Une u nongïalam ula ong, ba ka jingpynlong ia ka jingïakhih ka dei namar ka jingujor jong ka Elaka Nongkhlieh halor ka jingpyndonkam da ka bor ban shim ïa ki jaka da u Dolloi khlem ka jingïoh jingbit na ki trai jaka.
Ka Elaka Sutnga kala pynpaw ruh ïa ka jingsngewkhia bad kynnoh ba ka jaka tih ka don 652 hektar, hynrei ka jingpynbna pat ka long tang 217 hektar.
U Ma Lyngdoh ula ong, ba ka Council hapoh jongka Sixth Schedule, ka dei ban ïada ïa ki jaka bad ïa ki hok tynrai bad kdew ïa ki jingkynnoh bakla jong u CEM ha kaba ïadei bad ka NOC.
Da kaba pynpaw ba ka sanad ïa ki Dolloi, ula ong, ba yn ym lah ban ai ïa kano kano ka NOC khlem ka jingïoh jingbit na ka Elaka bad ka Council.
U President ka JSU u ma Jersom Shylla ula ong, ba ka jingïakhih ka long kaba jai jai bad ka dei da ka jingmut ban pynsngew ïa ki jingeh jong ki paitbah.
Ula kyntait ïa ki jingkynnoh ba ka don ka jingthmu ban pyntieng bad pynsyier bad kdew ba u CEM bad ki EM ki la mih ha ka por ba ka khyrdop jong ka Council la khang shwa ba ki nongïakhih kin wan poi.
“Hato ka JHADC kadei ka ïing shimet jong u CEM? Ngi wan tang ban aiti ïa ki jingpynsngew ïa ki jingeh jong ka Elaka Nongkhlieh” ong u ma Shylla.
Ula ong ba ka ejahar kaba la ujor hadien ka jingïakhih hynrei ki sengbhalang kin ïakhun pyrshah ïa katei lyngba ka lynti jong ka aiñ.
U Ma Shylla ula ai khublei ïa ki pulit kiba la lah ban tehlakam. Kine ki ar tylli ki seng ki la ai por haduh ka 20 tarik u Naitung ban leh da kaba tyngeh da kaba weng noh ïa u Dolloi bad ban pynduh noh ïa ka NOC kaba la ai sha ka Shree Cement.
Lada kam don kano kano ka jingshimkhia, ki la ong, ba kin nang pynjur shuh shuh ïa ka jingïakhih bad ban dawa ruh na u CEM ba udei ban hiar shuki noh.