Nongpoh, Naitung 15: Ka State Youth Basketball Championship 2026 ba la pynïaid da ka Ri-Bhoi District Basketball Association (RBDBA) ha ryngkat ka jingïatreilang bad ka Meghalaya Basketball Association (MBA) ka la sdang mynta ka sngi ha Nongpoh,. Ha kane ka lympung, haduh 7 tylli ki kynhun ïalehkai, kiba kynthup ïa ki kynhun shynrang bad kynthei na kylleng ka jylla, ki la wan ban aireng bad pyni ïa la ka sap ïalehkai.
Ïa ki jingïalehkai yn pynlong ha ar tylli ki jaka, kata ha ka madan basketball jong ka Alpha English Higher Secondary School bad ka St. Paul’s Higher Secondary School, Nongpoh.
Ka jingïalang plie pyrda ïa kane ka lympung ka la long ha Alpha English Higher Secondary School, ha kaba u MLA ka Nongpoh, Bah Mayral Born Syiem, u la long kum u kongsan, katba ka Kong Rona Khymdeit MDC ka Nongpoh ka la long kum ka symbud kongsan. La sakhi ruh da ka jingdonlang ki nongïalam ka RBDBA ba kynthup ïa u Bah Johny Lee Lamare, President, u Bah B. Marbaniang, General Secretary, lem bad kiwei pat ki nongkitkam bad ki riew rangbah.
Haba phai sha ka jingïalehkai plie pyrda mynta ka sngi ka la long hapdeng ka Ri-Bhoi District Basketball Association pyrshah ïaka St. Anthony’s School, Shillong. Ka jingïakhun ka la long kaba itynnad bad shongshit bha namar ka jingïakhun kaba tyngeh jong baroh ar kynhun. Ha kaba kut, ka St. Anthony’s School, Shillong ka la khur ïa ka jingjop da kaba pynliem ïa ka Ri-Bhoi District Basketball Association da 59-51 basket.
Haba ai jingkren, u Bah Mayral Born Syiem bad ka Kong Rona Khymdeit ki la ai jingïaroh ïa ka Ri-Bhoi District Basketball Association kaba la shim ïa kane ka sienjam ban pynlong ïa kum kane ka lympung, kaba long kum ka rynsa ban sei paidbah ïa ki sap ïalehkai jong ki samla haka jinglehkai basketball.
Ki la ong ruh ba kane ka jingïakob kan long ruh kum ka jingpynkhreh shuwa ka National Games, ïa kaba ka jylla kan pynlong ha u snem ban wan, ryngkat ka jingkyrmen ba napdeng ki nongïalehkai kiba ïashim bynta ha kane ka lympung, yn sa mih shibun ki sap kiba lah ban shah jied ban mihkhmat ïa ka jylla ha ka lympung National Games.
