Shillong, Niatung 14: Ka Meghalaya ka la dep sam haduh 84.77% ïa ki Enumeration Form jong ka Special Intensive Revision, 2026, ha kaba la sam 19,91,883 tylli ki phorm na ki 23,49,645 ngut ki nongthep vote haduh ka por 9.58 baje mynstep jong ka 14 tarik Naitung, ong u Chief Electoral Ophisar (CEO) u Dr. BDR Tiwari.
Na kitei ki Enumeration Form kiba la dep sam shaki paidbah, 5,64,610 tylli ki Form la dep ban pynrung haki kor Digital kaba la kot sha ka 24.03% na baroh ka jingdon ki nongthep vote, ong u Dr. Tiwari haba pyntip halor ka jingpyntreikam ïa ka SIR 2026.
Katkum ka jingong u CEO, ka West Jaiñtia Hills ka dei ka District ba bun tam ka jingsam ïa ki Form kaba la kot sha ka 98.94%, bud sa ka South West Garo Hills 97.77%, North Garo Hills 95.12%, South West Khasi Hills 90.37%, bad East Garo Hills 88.84%.
Haba phai sha ka jingpynrung ïa ki Form ha ki kor Digital, ka East Jaintia Hills ka lam khmat da 41.55%, bud sa ka South West Khasi Hills 40.31%, Eastern West Khasi Hills 36.73%, South West Garo Hills 34.01%, bad West Garo Hills 33.23%.
Kum shi bynta ban pynsngewthuh paidbah halor ka jingpyntreikam ïa ka SIR, u Dr Tiwari u la ïathuh ba la pynlong ïa ka Awareness and Interaction Program bad ki Dkhot ka Ïing Dorbar Thawaiñ ka Jylla Meghalaya ha ka hybrid mode ha MLA Hostel Conference Hall ha Shillong ha ka 13 tarik Naitung.
U CEO ula batai ïa ki jingthmu bad ïa ki rukom treikam jong ka SIR 2026 bad pan jingkyrshan na ki MLA ban pynshlur ïa ki nongshong shnong kiba dei hok ban iashim bynta.
Ula ong ba man ka taiew la pynlong ruh ïa ki video conference bad ki District Election Officers, Electoral Registration Officers bad Assistant Electoral Registration Officers ban bishar bniah ïa ka jingïaid shaphrang ha kaba ïadei bad ka jingsam ïa ki Form shaki thliew ïing bad ka jingpynrung ïa ki Form shaki kor Digital.
La bthah ïa ki ophisar ba kin buddien bha ïa ki Booth Level Officers bad ban pynbeit ïa ki jingeh bad ban pynthikna ban pyndep hapoh ka por ba la buh da ka Election Commission of India.
U Dr Tiwari u la ïaroh ïa ka jingtrei shitom jong ki DEO, ki ERO, ki AERO, ki BLO, ki BLO Supervisor bad kiwei kiwei ki nongkitkam jong ka tnat ilekshon halor ka bynta jong ki ban pyntreikam ïa ka SIR.
Ula kyrpad ïa ki paidbah ki bym pat ïoh ïa ki Enumeration Form ba kin ai ka jingïatreilang bad ki BLO ha ka por ba leit sam ïa ki Form sha ki ïing bad ban ïakynduh ïa ki ban ïoh jingïarap.
“Ka Ophis jong Chief Electoral Officer ka kyrpad biang sa shisien ïa baroh ki nongthep vote kiba dei hok ban ïashim bynta shitrhem ha ka Special Intensive Revision 2026 bad ban pynthikna ba uwei pa uwei u nongshong shnong uba dei hok un ïoh rung ha ka Electoral Roll,” ong ka kyrwoh.
