Jowai, Naitung 13: Ka Shnong Panaliar Jowai ha kane ka 12 tarik u Naitung kala plie paidbah ïaka Indoor Sports & Games Complex kaba don ha Kperlyngktuiñ Panaliar, ha kaba u Local MLA 2 Jowai Constituency ma Wailadmiki Shylla uba dei u myntri ka tnad Sports & Youth Affair Department, Health & Family Welfare bad Home (Passport) ula long kum u Kongsan, katba u Khroobok Passah, Assistant Director Sports & Youth Affairs Department kum u symbud kongsan.
Hashwa kane la don ka jingïalang bala pynïaid da u Waheh Chnong ma Riquoma Rq. Laloo la ïoh ka jingnguh Blei da u Jait dao Sumer, Chairman ka Local Committee ka Chnong bad ka jingkren halor ka jingïaid lynti naduh basdang ban tei ïa ka Indoor na u Samehi Laloo, Secretary Local Committee.
Ha u snem 2019 ka shnong kala wad ki lad ki lynti ban shna ïaka Indoor Hall na ka bynta ki khun jong ka shnong khnang ba kin ïoh ka lad ban pynlut ïa ka por jong ki ha ki kam ïalehkai Sports bad ha ka samoi treikam jong u snem 2020-2022 la ïoh ban sdang tei ïa katei ka Indoor Hall, naka liang ka shnong kala wad jingïarap ban pynmih pisa da kaba pynlong ïa ka Fete kumjuh ka jingïarap lyngba ki skim bapher bapher na u ma Sñiawbhalang Dhar, uba long mynta u Deputy Chief Minister 5,00,000/-, na ka Ophis u Governor haka jingïalam u ma Antonio Lakiang 7,00,000/-, na u Local MLA ma Wailadmiki Shylla 5,00,000/- bad na u ma Dr Wanweiroy Kharlukhi, MP Rajya Sabha 10,00,000/- nalor kiwei de.
Naka liang u kongsan ula plie pyrda ïa u mawnongrim bad la ai ruh ka jingkren da kaba pynsngew ïa ki kam kiba ula ïarap ïa ka hsnong Panaliar bad kaba hakhmat mynta ban pynbeit ïa u pud bad ka MCH hapoh kine ki khyndiat sngi kum u myntri ba peit ïa ka koit ka khiah, ula khot ruh ïa ki khun samla ba kyntiew ïa ka kam ïalehkai Sports.
Shuh shuh ula ong kum u MLA un ïaleh katba lah ban wad ki lad ki lynti ban pynbha pynmiat ïa ka madan phutbol jong ka shnong bad kiwei de ki jingdonkam hapoh ka shnong, da kaba ong donkam ka jingïatylli bad ka jingïatreilang khnang ban pynïaid shakhmat ïa ki kam ka shnong, ha ka juh ka por ula kular ban pynïoh jingïarap haduh 10 lak tyngka ban pynbit pynbiang ïa kane ka Indoor Hall.
Katba na ka liang u Marryngkat Syngkon, General Secretary ka Shnong Panaliar Jowai, ula ai ki kyntien ai khublei, ha kane ka sngi la wan ban sakhi lang da ki nongshong shnong.
