New Delhi, Naitung 10: U Myntri Sorkar Pdeng ba dei khmih ïa ka tnat Kam Pohïing bad Kam Ïatreilang, Amit Shah u la ai jingkren mynta ka sngi ha ka jingïalang Land Border Districts’ Superintendents of Police Conference-2026 ha New Delhi.
Ki Myntri Khynnah ka tnat Kam Poh ïing Nityanand Rai bad Bandi Sanjay Kumar, u Secretary ka tnat Kam Pohiing, u Director jong ka Intelligence Bureau (IB), ki Director General of Police jong ki jylla khappud, bad kiwei kiwei ki ophisar ki la ïadonlang ha kane ka jingïalang.
Ha kane ka jingïalang, u Myntri ka tnat Kam Pohïing u la ong ba kane ka jingïalang ka la pynskhem ïa ka rukom treikam kaba pura ha kaba ïadei bad ka jingshngaiñ jong ki jaka khappud. U la ong ruh ba ha ki por ban wan, kan don ka jingïatreilang na ka bynta ka jingshngaiñ jong ki jaka khappud.
U la ong ruh ba ha kane ka jingïalang kan don ïa ki jingïakren shaphang ki jingeh kiba ïadei bad ka jingshngaiñ ha ki jaka khappud, ka jingpynbeit ïa kine, bad ka jingwanrah ïa ki polisi na ka bynta kane.
U Amit Shah u la ong ba ki kam jong ka India kiba ïadei bad ki jaka khappud, kiba don nongrim ha ka Smart Border, kin long kiba hakhmat tam ha ka pyrthei ha ki por ban wan.
U la ong ruh ba ka Sorkar Modi, ha ryngkat ki kynhun kiba ïada ïa ki jaka khappud, ki bor pynïaid ïa ki jylla bad ki distrik, kito kiba ïadon bynta na ka Sorkar India, bad ki nongshong shnong – lyngba ka jingïatreilang – ki dang pynbiang ïa ka rynsan na ka bynta ka jingshngaiñ.
U Shah u la ong ba ki jaka khappud kiba shngaiñ, kiba riewspah, bad ka imlang sahlang kaba peitngor ki lah ban wanrah jingshngaiñ ha ka ri.
U Myntri ka tnat Kam Pohïing u la ong ba hapoh ka jingïalam jong u Myntri Rangbahduh Narendra Modi, ka ri ka la lait na ki kam Naxal bad ki kam lehnoh ha Jammu & Kashmir bad ka thaiñ shatei lammihngi, kaba long ka dak jong ka jingjop jong lang baroh.
U la bynrap ba ha ki lai snem ban wan, yn leh tyngeh pyrshah ïa ki kam drok bad yn ïoh ïa ka jingjop ha kane ka kam. U la ong ba yn dang pynbiang ïa ka kam kaba khlaiñ ban pyllait ïa ka ri na ka jingwan rung tuh ki briew bad ban pynthikna ba ym don kano kano ka jingwan rung tuh ki briew.
U Shah u la ong ba mynshuwa, ki jingeh ki long kiba shyrta bad ki jingpynbeit ki long kiba shipor, ha ka Sorkar Modi, yn dang pynbeit ïa ki jingeh naduh tynrai bad ngi dang pynthikna ba ki jingpynbeit ki long kiba shirta.
U Amit Shah u la ong ba ka Sorkar Modi ka la kyntiew ïa ka jingbei tyngka ha ki jaka khappud da 400 percent bad ka la pyndonkam ïa ka jingstad saïan ban pynkhlaiñ ïa ka jingshngaiñ ha ki jaka khappud.
U la ong ba hapoh ka Vibrant Villages Programme, u Myntri Rangbahduh u la ong ba ka shnong kaba khatduh jong ka ri ka dei ka shnong kaba nyngkong, hapoh kane ka sienjam ngi dang pyrshang ban ïada na ka jingphet shnong, ban pynmih ïa ki kam bad pynthikna ïa ka jingpyntreikam pura ïa ki skhim sorkar na ka bynta ka bha ka miat.
U Amit Shah u la ong ba u Myntri Rangbahduh Narendra Modi u la sdang ïa ka Demography Mission ban peit ïa ka jingkylla ha ka jingdon ki briew, wad ïa ki bynta ki bym ïahap, bad ai jingmut ban ïada na kum kine ki jingkylla ha ki por ban wan.
U la ong ba ka Sorkar Modi ka kut jingmut ban tehlakam ïa ka jingkylla bym ïahap ha ka jingdon ki briew kaba wan na ki daw ki bym ïahap. U Myntri ka tnat Kam Pohïing u la ong ba ka daw kaba kongsan jong ka jingkylla ha ka jingdon ki briew ha ki jaka khappud ka dei ka jingrung tuh ki briew na shiliang pud.
U Myntri ka tnat Kam Pohïing u la ong ba khnang ban pynskhem shisha ïa ka jingshngaiñ ha ki jaka khappud, ka Sorkar Modi ka la pynbiang ïa ka rynsan jong ka jingshngaiñ kaba pynkylla ïa ka rukom treikam jong ka India.
U la ong ba ka Sorkar Modi ka dang kylla na ka rukom treikam jong ki jaka pahara ïa ki jaka khappud kiba sah marwei sha ka rynsan kaba ïasohlang ha ki kam kiba ïadei bad ka jingshngaiñ.
U Myntri Sorkar Pdeng u la ban jur ba dei ban ioh ka jingtip shaphang ka jingkylla ha ka jingdon ki briew kaba wan na ki daw ki bym iahap ha ki jaka khappud naduh ki shnong haduh ki kyrdan kiba halor tam.
U Amit Shah u la ong ba ka Sorkar Modi ka dang ker ia ka jaka khappud kaba 1,610-km hapdeng ka India bad Myanmar ha ka jinglut kaba T 31,000 klur.
U la ong ba ka thong jong ka Sorkar kadei ban ïada na ki jinghiar thma sop sop, ka jingrung tuh, ka jingïalam bakla ïa ki briew, ka jingdie ïa ki drok, ka jingdie tuh ïa ki mar, ki jingma kiba wan na ki drone, ki kam beaiñ lyngba ki lad cyber, ki kam beaiñ kiba la pynskhem bha bad ki jingkylla ha ka jingdon ki briew; ban pynthikna ba ngi don ki jaka khappud kiba kham suk ka jingim; ïada na ka jingphet shnong na kine ki jaka; bad pynthikna ïa ka jingshngaiñ jong ki.
