SHILLONG, Naitung 10: Ka Seila Sap FCC ka la pynskhem ïa la ka jong ka jaka ha ka semi final jong ka lympung U-20 4th Division Football league 2026, ba la pynïaid da ka Shillong Sports Association (SSA), da kaba pynliem noh ïa ka Laitlyngkot SC da 4-1 kol ha ka Quarter final hynne ka sngi Thohdieng, ha madan First Ground-SSA Stadium.
Da kaba poi sha ka semi final ka Seila Sap FCC, ryngkat bad ki lai tylli kiwei pat ki kynhun kiba la rung hashwa, kata ka Golflink SC, Mawpdang SC bad ka Weilyngkut Area FCC, ki la pynthikna ban kiew kyrdan sha ka Third Division ha ka samoi ban wan.
Ha ka jingïakhun, ka Seila Sap ka la pynkhihjar lyngba u Melbertson Kharbangar (10’), u Leo Ferdinand Marbaniang (47’), u Sashang Gurung (63’) bad kawei ka kol ba la kum thep hi da u Banskhemlang Warlarpih jong ka Laitlyngkot ha ka minit kaba 73’.
Katba ïa ka shi kol jong ka Laitlyngkot la thep da u Nangtei Rynjah (67’).
