Buh jingthoh ka High Court halor ka jingpynkhreh ka Municipal ban pynkynriah ïa kiba die madan ha Laitumkhrah

Shillong, Naitung 7 : Ka ïing Bishar High Court ha ka Lah Sngi U Blei ka la buh jingthoh ïa ki jingpynkhreh jong ka Shillong Municipal Board (SMB) ban ai ïa ki Vending Certificate bad pynkynriah ïa 85 ngut ki nongdie madan ha Laitumkhrah, haba bthah ïa ki nongmudui ba kin leit jurip ïa ka jaka ba tyrwa ban pynkynriah ïa kine ki dukan, kaba don ha Brightwell Bungalow.
Ka Division Bench jong ka Chief Justice Revati Mohite Dere bad Justice W Diengdoh kala pynmih ïa ka hukum haba bishar ïa ka mukotduma PIL halor nongdie madan.
Kat kumka affidavit u CEO ka SMB u PK Boro, la pyntip ba yn sa sam ïa ki Certificate of Vending naduh ka 9 tarik Naitung haduh 10 tarik Naitung, 2026 ha Dhankheti-Malki, Laitumkhrah, Laban, Barik, Lumshatsngi bad Red Cross.
Ka Board ka pyntip ba ïa ki CoV jong ka Laitumkhrah, Dhankheti bad Malki la dep ban pynkhreh bad la long ba la khreh ban sam noh.
Na ka bynta ka Laitumkhrah, ka affidavit ka pyntip ba 86 ngut ki nongdie madan la shem ba ki dei kiba don hok ban ïoh shong dukan hadien ka jingleh survey bad ka jingbishar ïa ki jingkam.
Napdeng kine, 22 yn sa pynkynriah sha ka Municipal Parking Lot ha Dhankheti bad 64 sha ka phyllaw ka Brightwell Bungalow kaba don marjan ka Survey of India.
Man ki dukan kin don ïa ka jingheh ba 1.2mx1.8m bad la buh ban pyndep ïa kane ka jingpynkynriah hapoh ka 11 tarik Nailar 2026.Da ka jingmynjur, ïa kane ka kam la buh ban bishar biang ha ka 13 tarik Naitung, 2026.