Ap ka ïingbishar HC ïa ka kaiphod thied jaka na ka NHAI hadien ba shah kem u Project Director ha ka CBI

Shillong, Naitung 7 : Ka ïing Bishar High Court ha ka sngi Nyngkong ka la aipor 7 sngi ïa ka NHAI ba kan aiti ïa ka kaiphod halor kaei kaba long ba man haba ïadei bad jingmudui thied jaka, haba pyntip sha ïing Bishar ba u Ophisar ka NHAI ba ngat ha ka jingbishar pynkheiñ hukum (contempt) ula don mynta ha ka kti jong ki CBI.
ïa kane ka hukum la pynmih da ka Division Bench ka Chief Justice Revati Mohite Dere bad Justice W Diengdoh hadien ka jingbishar ïa ka mukotduma ba mudui da u (L) bah Kynjaimon Amse pyrshah iïa ka NHAI bad kiwei.
U nongiasaid ka NHAI S Sengupta ula pan por shi taiew ban ai ïa ka affidavit ban ai ia ki jingtip ba khatduh sha ïing Bishar halor kane ka kam.
Haba ailad ïa kane ka jingkyrpad, ka ïing Bishar kala bthah ba ïa ka kaiphod dei ban aiti sha ka Registry hashuwa ka sngi shong bishar ban wan bad ban aiti lypa ruh ïa ki copy sha baroh ki liang mamla.
Ka ïing Bishar ka la shim khia ruh ïa kaei kaba long ba man ïa u Anand Singh Chauhan, ïa uba la phah ïa ka contempt notice ha ka 20 tarik Lber 2026.
U Sengupta u pyntip ïa ka ïing Bishar ba u Chauhan ula shah kem ha ka CBI ha ka 1 tarik Naitung, 2026, bad hashuwa kane, ula shah pynkynriah na ka PIU-Shillong sha PIU-Hanuman Ghat.
“Ha kano kano ka por ba la pynlait ïa u un sa wan mih hakhmat kane ka ïing Bishar” pyntip u Sengupta. ïa kane ka mukotduma yn sa shong bishar biang ha ka 13 tarik Naitung, 2026.