Ym don sabut ban pynshisha halor ka jingkynnoh kiba leit shah pyntbit ban ïohkam sha Pune

Shillong, Naitung 7 : Ka Meghalaya State Skill Development Society (MSSDS) mynta ka Sngi Ba Ar ka la pyntip ba ka la dep ban pynshisha halor ki jingkynnoh jong kito ki samla ba leit shah pyntbit ban ïoh kam sha Pune ne kiba leit ha ka skhim On-the-Job Training (OJT) ha Pune da ka jingbei pisa ka sorkar jylla bad lap ba ym don sabut ba pynshisha halor kine ki jingkynnoh.
Haba shim khia ïa ki jingkynnoh kiba la saphriang ha ki Social Media bad ki katto katne ki kot khubor, ka MSSDS ka la pynpaw ba mar mar ka la bud dien ïa kane ka kam namar ka kwah ban tip ïaki jingshisha bad khamtam ban ai ka jingïada ïa ki samla ba leit shah pyntbit tangba kam lap ïa ki sabut kiba biang.
“ Ka sorkar Meghalaya ka shim khia bha na ka bynta ka bha ka miat, ka akor ka burom bad ka lawei jong kito ki samla kiba ka phah leit pyntbit. Kumta mar mar la shim khia ïa ka kam da kaba ïaid kat kum ki kyndon aiñ” ong ka MSSDS.
Ka Society ka la pynpaw ba mar mar ka la bthah ïa kito kiba phah pyntbit ne Training and Placement Provider (TPP) ban ïakren bad baroh kiba phah leit pyntbit bad ban phah wanphai noh ïa ki sha ka jylla ha ka jinglut jingsep jongka sorkar. Arngut na kiba phah leit pyntbit ki la rai ban wan phai kynthup ïa kato kaba ujor bad la pynbiang ïa ka bai leit bai wan jongki.. Katba kiwei pat kiba don sha Pune wat la pyntip ba ki lah ban wanphai sha ka jylla lada ki kwah, hynrei ki la rai ban sah bad bteng ïa ka OJT tad haduh ban da ïoh kam.
Ka MSSDS ka la ïathuh ba ka la tohkit bniah na baroh ki liang, ïakren ruh bad ki bor pulit ha Pune, ki nongmihkhmat na ka National Valunteer Meghalaya bad ki Seng Bhalang kiba don ha katei ka nongbah bad la pynlong wat da ka Video Conference ruh da ka MSSDS.
Halor kine ki jingtohkit la lap ba ym don sabut ban pynshisha halor ki jingkynnoh khamtam kito kiba la rai ban bteng ïa ka jingshah pyntbit ki la pynpaw ba ki bit ki biang bad ym don kano kano ka jingpynwit pynthut ïa ki ha ka jaka ba shah pyntbit.
Ki la pynpaw ruh ka jingsngewkhia jur ba kine ki jingkynnoh ba khlem nongrim ka lah ban ktah pynban ïa ki khamtam ïoh ki nongai kam ki tieng ban khot bad ai kam ïa ki.
Ka MSSDS ka la pynpaw ba ïa kitei kiba kynnoh ha ka jingshisha la dep batai shai naduh ba sdang halor ka jingshah pyntbit.
Katei kaba ujor ka la jied hi ban pyntbit ha ka Senior Beauty & Spa Therapist Course bad hadien ba ka la shah jied la dep batai shai ha ka shaphang kane ka kam.
ïa kane ka prokram la bei tyngka nadong shadong da ka sorkar naduh ka bai shah pyntbit, bai leit bai wan, bai sah bad ka stipend kaba 4 hajar tyngka shisbnai ha ka por ba don ha ka jingshah pyntbit.
La pyntbit bniah nadong shadong sha kiba tohkit bad ka MSSDS ka la ïaid kat kum ki lynti kiba dei ban leh ha kaba ïadei bad kane ka jingphah pyntbit bad ban pynïoh kam ïa ki samla .Shwa ïa kane la ai counselling ne batai shai ha ki naduh ba sdang ba kin sngewthuh bha shaphang ka kam.
Ka MSSDS ka pyntip ruh ba kan ïai bud dien ïa ka kam bad lada ka lap ba ka don kano kano ka jingpynkheiñ ïa ki kyndon ka sorkar kan ym map hynrei kan leh da kaba tyngeh kat kum ki kyndon aiñ.